Azərbaycan Tibb Universitetinin tələbələri Türkiyənin Rəcəb Tayyib Ərdoğan Universitetində keçirilən 3 həftəlik yay məktəbi proqramında uğurla iştirak ediblər.
“Tehsil365” xəbər verir ki, bu yay məktəbi Azərbaycan Tibb Universitetinin tərəfdaş ali təhsil müəssisələri ilə həyata keçirdiyi növbəti uğurlu beynəlxalq akademik proqramlardan biridir. Proqram universitetlər arasında imzalanmış əməkdaşlıq memorandumu çərçivəsində təşkil olunub və bu cür tərəfdaşlıqların tələbələr üçün yaratdığı real imkanların daha bir nümunəsidir.
Əməkdaşlıq memorandumu əsasında tələbələr beynəlxalq yay məktəblərində iştirak etmək, fərqli akademik mühitlə tanış olmaq, yeni bilik və bacarıqlar əldə etmək, həmçinin beynəlxalq əlaqələrini genişləndirmək imkanı qazanırlar. Bu cür proqramlar universitetlər arasında uzunmüddətli əməkdaşlığın praktiki nəticəsi olmaqla yanaşı, tələbələrin peşəkar və şəxsi inkişafına da mühüm töhfə verir.
Yay məktəbi müddətində tələbələr universitetin akademik mühiti ilə yaxından tanış olub, müxtəlif tədris fəaliyyətlərində iştirak edərək nəzəri biliklərini möhkəmləndirib və praktiki təcrübələrini artırıblar. Eyni zamanda onlar yerli tələbələrlə ünsiyyət quraraq yeni dostluqlar və gələcək əməkdaşlıqlar üçün akademik əlaqələr formalaşdırıblar.
Azərbaycan Tibb Universiteti beynəlxalq tərəfdaşlıq əlaqələrinin inkişafını prioritet istiqamətlərdən biri kimi davam etdirir. Universitetlər arasında imzalanan əməkdaşlıq memorandumları tələbə və müəllim mobilliyi, yay məktəbləri, qısamüddətli təhsil proqramları və birgə elmi layihələrin həyata keçirilməsi üçün geniş imkanlar yaradır və bu istiqamətdə yeni təşəbbüslərin reallaşdırılması davam etdirilir.