“Yeni il tıxaclarla başlayıb. Bu ilki tıxaclar əvvəlki illərin tıxaclarından bir az fərqlənəcək”.
Bu sözləri “Tehsil365”ə açıqlamasında nəqliyyat eksperti Aqil Rəhimov bildirib.
Ekspert bildirib ki, yol təmiri və məktəblərin açılması tıxacların artmasına səbəb ola bilər.
“Eyni zamanda, 50-dən çox yol təmir olunub və bir neçə yol da təmir olunacaq. Bunların vaxtları üst-üstə düşdüyünə görə ola bilsin ki, tıxaclar arta bilər. Bundan başqa, ənənəvi olaraq məktəblər başlandıqda valideynlər bütün nəsillə bir yerdə şagirdi məktəbə gətirirlər. Və maraqlısı odur ki, bir maşınla yox, hərəsi öz maşını ilə gəlir. Onlar başa düşməlidirlər ki, tıxacların artmaması üçün bir neçə maşında gəlməsinlər”.
Onun sözlərinə görə, məktəblərin ətrafında parklanma qaydalarına nəzarət gücləndirilməlidir.
“Bundan başqa, məktəblərin yanında parklanma yerində həmişə olduğu kimi 2-ci və 3-cü zolaqda dayanacaqlar. Əlbəttə, yol polisinin rolu böyükdür. Hər il olduğu kimi onlar ciddi iş rejiminə keçəcəklər və məktəblərin yanındakı piyada keçidlərində şagirdləri keçirtməyə kömək edəcəklər. Yaxşı olar ki, parklanma məsələsinə də diqqət yetirsinlər ki, xaos yaranmasın”.
Ekspert vurğulayıb ki, məktəb avtobuslarının tətbiqi tıxacların azalmasına kömək edə bilər.
“Əvvəlki illərdə sürücülər alternativ yollardan istifadə edirdilər. İndi isə həmin yolların təmiri ilə əlaqədar alternativ yollar da azalıb. Avtobusların geniş tətbiqi isə maddiyata, imkana bağlı olan bir şeydir. Özəl məktəblərdə bu proses olunur, çünki özəl məktəblərdə şagirdlər azdır. Kütləvi sürətdə minlərlə, yüzlərlə şagirdin oxuduğu məktəbdə bunu təşkil etmək çox çətindir. Çünki bir məktəbə 10-15 avtobus lazım olacaq, bu isə maddiyata bağlıdır. Valideynlər büdcədən pul ayırıb avtobusların sürücülərinə maaş verməlidirlər. Hər valideynin isə buna gücü çatmır, ona görə bu bir az çətin prosesdir. Özəl məktəblərin bəzilərində artıq təşkil olunub və bu prosesi orda təşkil etmək asandır. Lakin adi məktəblərdə bunu tətbiq etmək çox çətindir, amma olmağı yaxşı olardı”.