“Hal-hazırda yeni tədris ilinin başlanmasına artıq 2 həftədən də az bir müddət qalıb. Əlbəttə, dərs ilinin başlanmasında təhsil müəssisələrinin hazırlıq səviyyəsi ötən illərlə müqayisədə bu il daha yaxşıdır”.
Bu sözləri “Tehsil365”ə açıqlamasında təhsil eksperti Elçin Əfəndi bildirib.
Ekspert bildirib ki, çatışmayan məktəblər də tədris ili başlayana qədər dərs vəsaitləri ilə təmin olunacaq.
“Düzdü, bizim əsasən növbəti dövr üçün düşündüyümüz dərs vəsaitlərinin təminat məsələsidir. Şagirdlər tədris prosesi başlayan kimi dərs vəsaitləri ilə təmin olunsunlar. Bildiyim qədərilə bəzi məktəblərə artıq vəsaitlər təqdim olunmur, amma yenə də çatışmayan məktəblər var. Yəqin ki, onlara da tədris ili başlayana qədər müvafiq dərs vəsaitləri çatdırılacaq”.
Onun sözlərinə görə, təmir olunan və yeni inşa edilən məktəblər növbəti tədris ilindən istifadəyə veriləcək.
“Eyni zamanda, bəzi yeni məktəblər var. Artıq növbəti tədris ili üçün onlar istifadəyə veriləcək. Təmir-tikinti işləri görülüb, bəzi ərazilərdə yekunlaşmaq üzrədir. Bizim bəzi respublika bölgələrində təmirə ehtiyacı olan bir neçə məktəb təmir olunub və növbəti tədris ilindən etibarən artıq istifadəyə veriləcək”.
Ekspert vurğulayıb ki, tədris ili başlayana qədər mövcud xırda problemlərin həllinə diqqət yetirilməlidir.
“Bununla paralel, dərs ili başlanandan təxminən 2 ay sonra artıq qış rejiminə keçid olacaq. Düşünürəm ki, istilik sistemi ilə təchizat məsələsi də diqqətdə saxlanılmalıdır. Ümumilikdə, təbii ki, qənaətbəxş kimi dəyərləndirmək olar. Bəzi xırda problemlər var ki, onlar da yəqin ki, tədris ili başlanana qədər düzələcək”.