UNEC KİM 24/7 Kitabxanasının “KİTABIM” yeni layihə-podkastının həmsöhbəti Azərbaycan Dövlət İqtisad Universiteti (UNEC) “İqtisadiyyat” kafedrasının dosenti Azər Mehtiyev və baş müəllim Ülviyyə Rəsul olub.
“Tehsil365” xəbər verir ki, “Kitabın ən yaxşı bələdçisi — müəllifin özüdür” sloqanını rəhbər tutan podkast-layihənin bu buraxılışında Ankara Hacı Bayram Vəli Universitetinin professoru Atilla Gökçe, dosent Azər Mehtiyev və baş müəllim Ülviyyə Rəsulun həmmüəllifliyi ilə UNEC-in 96 illik yubileyinə həsr olunan "İqtisadi dinamikanın əsasları" adlı yeni çapdan çıxmış dərsliyindən bəhs edilib.
Qonaqlar Azərbaycan və Türkiyə alimlərini bir araya gətirən bu kitabın yaranma ideyası, yazı prosesində qarşıya çıxan çətinlik və maneələr, müəlliflər arasındakı fikir ayrılıqları, müzakirələr barədə danışıblar. Həmçinin, bu dərslik vasitəsilə iqtisadi proseslərin dinamik xarakterinin, onların modelləşdirilməsi xüsusiyyətlərinin və tətbiqi üsullarının öyrənilməsinin tələbələr tərəfindən daha rahat mənimsələcəyi barəsində geniş məlumat veriblər.
Qeyd edək ki, “KİTABIM” layihəsinin rəhbəri Arzu Məmmədova, icraçı heyət üzvləri Kamal Nuriyev və Həsən Müslümovdur.