"Yüksək səviyyədə nəticə göstərən şagirdlərin sayında artım var".
“Tehsil365” xəbər verir ki, bunu elm və təhsil naziri Emin Əmrullayev PISA 2025 – Şagirdlərin Qiymətləndirilməsi üzrə Beynəlxalq Proqramının nəticələrinin təqdimatı zamanı deyib.
Nazir bildirib ki, PISA nəticələrində yüksək 5-ci və 6-cı səviyyələrdə nəticə göstərən şagirdlərin göstəricisi də xüsusi əhəmiyyət daşıyır. Onun sözlərinə görə, bu səviyyələrdə nəticə göstərən 15 yaşlı şagirdlər digər ölkələrdəki ən yüksək nəticə göstərən həmyaşıdları ilə müqayisə edilə biləcək bilik və bacarıqlara malikdirlər.
E.Əmrullayev qeyd edib ki, riyaziyyat üzrə yüksək səviyyədə nəticə göstərən şagirdlərin payında əvvəlki illərlə müqayisədə artım müşahidə olunur.
"2018-ci illə müqayisə etsək, təxminən 4 dəfəyə yaxın artım var. Bu, mənə elə gəlir ki, hiss olunacaq göstəricidir",- deyə nazir bildirib.
Onun sözlərinə görə, yüksək səviyyədə nəticə göstərən şagirdlər gələcəkdə analitik düşünmə qabiliyyətinə malik mütəxəssislərin formalaşması baxımından mühüm potensial təşkil edir.
"Bizim üçün nəzərdə tutduğumuz uşaqlar gələcəyin yüksək analitik düşüncəsi olan insanlarıdır. Bu rəqəmlər kifayət qədər yaxşı göstərici ola bilər",-E.Əmrullayev qeyd edib.
Nazir təbiət elmləri üzrə nəticələrə də toxunub. O bildirib ki, 81 ölkə və region arasında Azərbaycanın nəticəsi 63-cü, Bakı şəhərinin nəticəsi isə 47-ci yerdə qərarlaşıb.
E.Əmrullayev qeyd edib ki, Bakı üzrə təbiət elmlərində də müəyyən müsbət dinamika müşahidə olunur. Bununla yanaşı, bu istiqamətdə nəticələrin daha dərindən təhlil edilməsinə ehtiyac olduğunu vurğulayıb.
Nazir oxu savadlılığı ilə digər fənlər üzrə nəticələr arasında əlaqəyə də diqqət çəkib.
"Oxu aşağı olanda, təbii ki, fənlər də. Mətni oxuyub başa düşməyincə onunla məsələni həll etmək, tələb olunanı yerinə yetirmək mümkün deyil. Oxuyub cavab verəndə bununla bağlı daha ciddi problemlərimiz olduğu görünür".