PISA nəticələri təhsil siyasətinin formalaşdırılması və həyata keçirilən islahatların nəticələrinin qiymətləndirilməsi baxımından mühüm göstəricidir.
“Tehsil365” xəbər verir ki, bunu elm və təhsil naziri Emin Əmrullayev PISA 2025- Şagirdlərin Qiymətləndirilməsi üzrə Beynəlxalq Proqramının nəticələrinin təqdimatı zamanı deyib.
Nazir bildirib ki, PISA şagirdlərin bilik və bacarıqlarını tətbiq etmək imkanlarını obyektiv şəkildə ölçən beynəlxalq qiymətləndirmə vasitəsidir.
"PISA elə bir şkaladır, elə bir ölçüdür ki, vərdişlər, biliklər tətbiq olunubsa, hansı faktların olmasından asılı olmayaraq, bu, artıq kiminsə rəyi, kiminsə subyektiv fikrinə yol vermədən, rəqəmlər üzərində və təhlil olunmuş faktlar əsasında aparılır",- deyə E.Əmrullayev qeyd edib.
O vurğulayıb ki, PISA nəticələri yalnız statistik göstərici kimi deyil, həm də təhsil siyasətinin təhlili baxımından əhəmiyyətlidir.
"PISA nəticələri dərin təhlil aparmaq, təhsil siyasətini araşdırmaq, yeni islahatları müəyyənləşdirmək, o cümlədən əvvəlki islahatların hansının necə işləməsi ilə bağlı nəticəyə gəlmək baxımından vacibdir",- deyə nazir bildirib.
E.Əmrullayev qeyd edib ki, təhsil siyasəti yalnız rəqəmlərə və statistik göstəricilərə əsaslanmamalı, eyni zamanda müəyyən prinsiplər və qaydalar üzərində qurulmalıdır.