Amerikalı alimlər fizikanın 100 ildən artıqdır məlum olan əsas hadisələrindən biri ilə bağlı yeni kəşf ediblər.
“Tehsil365” xəbər verir ki, araşdırmanın nəticələri“Nature Materials” jurnalında dərc olunub.
Karnegi Mellon Universitetinin tədqiqatçıları müəyyən ediblər ki, Holl effekti yalnız maqnit sahəsi materiala perpendikulyar istiqamətdə tətbiq edildikdə yaranmır.
Alimlər bu effektin maqnit sahəsi materialın səthi boyunca istiqamətləndirildikdə də müşahidə oluna bildiyini nümayiş etdiriblər.
Holl effekti ilk dəfə 1879-cu ildə amerikalı fizik Edvin Holl tərəfindən kəşf edilib. Bu hadisə maqnit sahəsinin elektrik cərəyanının hərəkətinə təsiri nəticəsində materialda ölçülə bilən gərginliyin yaranması ilə bağlıdır. Bu prinsip bu gün avtomobillərdən kompüter klaviaturalarına qədər müxtəlif texnologiyalarda istifadə olunan sensorların hazırlanmasında tətbiq edilir.
Yeni araşdırmada alimlər bir neçə atom qalınlığında xüsusi materialdan istifadə ediblər. Tədqiqatçılar tantal iridium telluridi maqnit xüsusiyyətlərinə malik başqa bir materialla birləşdirərək çox nazik quruluş hazırlayıblar. Nəticədə materialda Holl effektinin əvvəllər müşahidə edilməyən forması qeydə alınıb.
Alimlərin sözlərinə görə, kəşf gələcəkdə maqnit sahələrini müxtəlif istiqamətlərdə ölçə bilən daha kiçik və sadə sensorların hazırlanmasına imkan yarada bilər. Belə texnologiyalar elektronika, nəqliyyat və tibbi görüntüləmə sahələrində istifadə oluna bilər.
Hazırda tədqiqatçılar oxşar xüsusiyyətlərə malik digər materialları araşdırır və yeni qurğunun otaq temperaturunda işləyib-işləməyəcəyini yoxlayırlar. Bu mərhələ texnologiyanın praktik tətbiqi baxımından mühüm hesab olunur.