“Bu gün gənclər dini məlumatları əsasən sosial şəbəkədən əldə edir. Ümumiyyətlə, sosial şəbəkələr insanın ailə həyatına elə formada daxil olur ki, tək təhsil yox, həmçinin tibb, informasiya, elm belə sosial şəbəkələrdən əldə edilir”.
Bu sözləri “Tehsil365”ə açıqlamasında ilahiyyatçı və din xadimi Ağa Hacıbəyli bildirib.
İlahiyyatçı bildirib ki, sosial şəbəkələrdən alınan yanlış dini məlumatlar cəmiyyətdə qütbləşmə yaradır.
“Demək olar ki, hər bir məsələ birbaşa İnstaqram, Tiktok, YouTube kimi platformalardan əldə edilir. Bununla yanaşı, dini məsələlər və maarifləndirmə də çox təəssüflər olsun ki, bu mənbələrdən alınır. Alınan mənbələr də bəzən tədqiq olunmadığı və tənqid edilmədiyi üçün bir qrup gənclər də onu mənimsədikdən sonra özünü allameyi-cihan hesab edir. Beləcə cəmiyyətin içərisində çox ciddi qütbləşmələrə yol açır və bilgisiz, fundamental biliklərə, təməl kitablara vaqif olmayan insanlar çox səthi və bəsit bilgilərlə özlərini din bilgisi kimi nümayiş etdirirlər. Bu da əslində, ifadə elədiyimiz kimi çox ciddi fəsadlara yol açır, cəmiyyətdə ciddi çatlar əmələ gətirir”.
Onun sözlərinə görə, sosial şəbəkədə populyarlıq dini alim olmaq göstəricisi deyil.
“Açığı, günün tələbləri bu gün daha çox akademik səviyyədə dini öyrənmək əvəzinə daha çox bəyənməsi çox olan bir insan sanki din alimi kimi göstərilir və ola bilsin ki, sosial şəbəkəni gözəl işlədən bir adam daha çox populyardır, nəinki elmi mənbələrə istinad edib fundamental dəyərlərə sahib olan bir alim. Belə bir paradoksu günümüzdə yaşayırıq. Lakin burada onu demək istərdim ki, biz alimləri ayırmırıq. Əslində, gerçək alim bütün hər şeyi bilir. Din yol deməkdir, həqiqətə və səadətə gedən yolu bilən insan ALLAHın ən ali isminin təcəllisi ilə bərəkət qazanmış adamdır. Bəsirəti açıq bir insandır, işin həqiqətini və hikmətini idrak edən biridir”.
Din xadimi vurğulayıb ki, yüksək səviyyəli alimlərin fikirləri daha çox təbliğ olunmalıdır.
“Belə bir dövrdə bu kimi bilgilərə sahib olan, səviyyəsi yuxarı olan alimlərimizi qabağa çəkib onları sosial şəbəkələrdə fikirlərini daha çox qabartmaq, onlardan rəylər almaq, eyni zamanda onların reportajlarını hazırlamaq, verilişlərini, proqramlarını təmin etmək daha gözəl olardı. Əks təqdirdə, bu cılızlaşma getdikcə daha böyük radikal düşüncələrə və fikirlərin yayılmasına, təxribatçı düşüncələrin formalaşmasına şərait yarada bilər”.