150 min şagird əlavə akademik saatlara cəlb olunub.
“Tehsil365” xəbər verir ki, bunu Təhsil işçilərinin sentyabr konfransında Məktəbəqədər və Ümumi Təhsil üzrə Dövlət Agentliyinin direktoru Eşqi Bağırov çıxışı zamanı bildirib.
O qeyd edib ki, şagird nailiyyətlərinin yüksəldilməsi istiqamətində müxtəlif müdaxilə tədbirləri həyata keçirilib və bunun nəticəsində müsbət dəyişikliklər əldə olunub.
Eşqi Bağırovun sözlərinə görə, zəif nəticə göstərən şagirdlərlə iş çərçivəsində təxminən 150 min şagirdin əlavə akademik saatlara cəlb olunması təmin edilib.
“Bu istiqamətdə əsas və irimiqyaslı tədbirlərdən biri zəif şagirdlərlə iş olub. Təxminən 150 minə yaxın şagirdin əlavə akademik saatlara cəlb olunması təmin edilib”, - deyə o bildirib.
Agentlik direktorunun sözlərinə görə, müəllimlərə dəstək məqsədilə 90 mindən çox müəllimin dərsi dinlənilib.
O vurğulayıb ki, dərsdinləmələr yalnız məktəbin inzibati heyəti tərəfindən deyil, bu sahədə ixtisaslaşmış peşəkar metodistlər tərəfindən də həyata keçirilib.
Bildirilib ki, təcrübəli müəllimlərin gənc həmkarlarına dəstəyinin təmin edilməsi məqsədilə təşkil olunan kiçik təlimlərə 47 minə yaxın müəllim cəlb olunub.
Eşqi Bağırov əlavə edib ki, məktəblərdə yay və qış məktəbləri də təşkil olunub. Bu proqramlarda nailiyyətləri zəif olan 136 minə yaxın şagird iştirak edərək əlavə akademik saatlara cəlb olunub.
MÜTDA rəhbərinin sözlərinə görə, ilk dəfə bu il 5-ci sinif şagirdlərinin rəqəmsal savadlılığı ilə bağlı irimiqyaslı qiymətləndirmə aparılıb:
“İnanırıq ki, onların nəticələri də növbəti mərhələdə müsbət dəyişikliyə səbəb olacaq”.
Agentlik direktorunun sözlərinə görə, ümumi təhsil müəssisələrində həyata keçirilən ənənəvi layihələrin əhatəliliyi də artırılıb və yeni tədris ilində bu istiqamətdə işlərin genişləndirilməsi nəzərdə tutulur.