"Şagirdlərin təbiət fənni üzrə nəticələri açıqlanıb".
“Tehsil365” xəbər verir ki, bunu Azərbaycan Respublikasının Təhsil İnstitutunun direktoru səlahiyyətlərini müvəqqəti icra edən, nazirin müşaviri Elnur Əliyev çıxışı zamanı bildirib.
O qeyd edib ki, 6-cı siniflər üzrə oxu və riyaziyyatla yanaşı, təbiət fənni üzrə də şagirdlərin öyrənmə vəziyyəti qiymətləndirilir.
Bildirilib ki, 5-ci və 6-cı siniflərdə tədris olunan təbiət fənni kimya, biologiya və fizika istiqamətlərinin qarşılıqlı əlaqəli şəkildə bir fənn daxilində öyrədilməsini nəzərdə tutur.
Elnur Əliyevin sözlərinə görə, son üç il ərzində təbiət fənni üzrə şagirdlərin öyrənmə vəziyyəti qiymətləndirilib. Bu müddətdə nəticələrdə əsaslı artım müşahidə olunmasa da, müəyyən sabitlik qeydə alınıb və şagirdlərin orta balında cüzi yüksəliş baş verib.
O bildirib ki, səviyyələr üzrə nəticələrdə də oxşar mənzərə müşahidə olunur. Bu baxımdan təbiət fənnini tədris edən müəllimlərin şagirdlərin nəticələrinin yüksəldilməsi istiqamətində səylərini artırmasına ehtiyac olduğu vurğulanıb.
Elnur Əliyev oxu bacarıqlarının səriştələr üzrə inkişafına da toxunub. Bildirib ki, şagirdlərin faktoloji qavrama, tənqidi təfəkkür və münasibət bildirmə, həmçinin şərh etmə, əlaqələndirmə və dəyərləndirmə bacarıqları qiymətləndirilib.
Onun sözlərinə görə, hər üç istiqamət üzrə müsbət dinamika müşahidə edilsə də, şagirdlər tənqidi təfəkkür tələb edən sualları cavablandırmaqda daha çox çətinlik çəkirlər.
“Əgər mətndə konkret faktlar verilibsə, onu asanlıqla tapıb sualları cavablandırırlar. Ancaq müəllifin rəyi, “niyə”, “nə” tipli daha çox əlavə düşünmə tələb edən suallarda hələ də çətinlik çəkirlər. Bu istiqamətdə ibtidai sinif müəllimlərinin daha çox fokuslanması gərəkdir”, – deyə Elnur Əliyev bildirib.
O qeyd edib ki, 4-cü sinif şagirdləri üçün ən asan tapşırıqlar mətndə açıq şəkildə verilmiş informasiyanın tapılması ilə bağlı olub. Belə tapşırıqlarda şagirdlərin doğru cavab faizi 65 faizə qədər yüksəlib.
Ən çətin tapşırıqlar isə mətnin quruluşu və üslubunun qiymətləndirilməsi, müəllifin mövqeyinin müəyyənləşdirilməsi kimi əlavə düşünmə tələb edən suallarla bağlı olub.