“Məsuliyyət hissi yaranırsa, insan özü özünü idarə etməyə başlayır”
“Tehsil365” xəbər verir ki, bu sözləri Dövlət İmtahan Mərkəzinin İdarə Heyətinin sədri Məleykə Abbaszadə Təhsil işçilərinin sentyabr konfransında çıxışı zamanı bildirib.
"Zamanı hiss etməmək hər şeyə təsir edir. Burada düşünmək lazımdır ki, dərslərin özünün aparılması və müəllimlərin bu məsələni şagirdlərlə birlikdə müzakirə etməsi necə təşkil oluna bilər.
Yalnız cəzalandırmaqla biz uşaqlarda bu hissi yarada bilməyəcəyik. Mən bunu dəfələrlə nəvələrimdə də görmüşəm. “Vaxtı itirdin, deməli, cəzalanırsan” yanaşması belə işləmir.
Uşaq bunu doğrudan da özü hiss etməyə başlamalıdır.
Biz həmin şəxsdə məsuliyyət hissini böyüdüb, formalaşdırmağı bacarmalıyıq. Məsuliyyət hissi yaranırsa, insan özü-özünü idarə etməyə başlayır və vaxtını düzgün hiss edir.
Burada daha çox tərbiyəvi məsələlərdən söhbət gedir. Bu istiqamətdə müəllimlər üçün həm yeni üsullar var. Eyni zamanda, təəssüf ki, sosial şəbəkələrdə çoxlu psevdo-kouçlar var ki, müxtəlif fikirlər səsləndirirlər və insanlar öz vaxtlarını buna sərf edirlər.
Amma real işləyən alətlər də var. Bu alətləri pedaqoji ictimaiyyətə çatdırmaq, müəllimlərlə işləmək üçün, yəqin ki, Təhsil İnstitutu müəyyən tədbirlər görə bilər. Müəllimlərə, təbii ki, dəstək lazımdır.
Müəllimlər üçün elə bir platforma da lazımdır ki, onlar istədikləri sualı həm öz həmkarları ilə müzakirə edə, bölüşə bilsinlər, eyni zamanda daha təcrübəli müəllimlərdən nəyisə öyrənə bilsinlər. Hamınıza uğurlar arzulayıram".