UNEC-də “Səhiyyənin idarə edilməsi” MBA ixtisaslaşmasının müasir tələblərə uyğunlaşdırılması istiqamətində növbəti əməkdaşlıq Baku Medical Plaza ilə olub.
“Tehsil365” xəbər verir ki, bu məqsədlə UNEC-in rektoru professor Ədalət Muradov, Azera Holdinqin direktoru Akif Əliyev, Baku Medical Plazanın Mərkəz filialının direktoru Tamara Rəsulova və müvafiq struktur rəhbərlərinin iştirakı ilə görüş keçirilib. Görüşdə tərəflər arasında mümkün əməkdaşlıq imkanları müzakirə olunub.
Sonda UNEC ilə Baku Medical Plaza arasında əməkdaşlığa dair memorandum imzalanıb.
Memoranduma əsasən, “Səhiyyənin idarə edilməsi” ixtisaslaşması üzrə təhsil alan UNEC magistrləri üçün təqaüd imkanlarının yaradılması, onların Baku Medical Plaza-da təcrübə keçməsi, eləcə də səhiyyə müəssisələrinin idarə edilməsi sahəsində çalışan mütəxəssislərin praktiki bilik və təcrübələrini magistrlərlə bölüşməsi nəzərdə tutulur.
Əməkdaşlıq çərçivəsində, həmçinin səhiyyə müəssisələrinin idarə edilməsi, tibbi xidmətlərin keyfiyyəti, səhiyyə iqtisadiyyatı və marketinqi, insan resurslarının idarə edilməsi, rəqəmsal səhiyyə və digər istiqamətlər üzrə birgə layihə və tədqiqatların həyata keçirilməsi planlaşdırılır.
Görüşdə Azera Holdinq ilə əməkdaşlığın gələcəkdə digər istiqamətləri də əhatə etməklə genişləndirilməsi barədə razılıq əldə olunub.