Azərbaycan Dövlət Mədəniyyət və İncəsənət Universitetinin (ADMİU) Keyfiyyət təminatı və strateji planlama departamentinin müdir müavini, Teatrşünaslıq kafedrasının dosenti Elçin Cəfərov Türkiyənin İstanbul şəhərində səfərdə olub.
“Tehsil365” xəbər verir ki, Səfər çərçivəsində İstanbul Medeniyyet Universiteti və İstanbul Gelişim Universitetinin rəhbərliyi və professor-müəllim heyəti ilə bir sıra mühüm görüşlər keçirilib. Görüşlərdə “Dövlət idarəçiliyi modelləri və yaradıcı sənayelərdə davamlılıq siyasəti” adlı elmi-tədqiqat layihəsinin detalları, tətbiq mexanizmləri və gözlənilən nəticələri ətraflı müzakirə olunub.
Görüşlərdə həmçinin universitetlər arasında təhsil və mədəniyyət sahəsində ikitərəfli əməkdaşlıq imkanları, təcrübə mübadiləsi, akademik layihələr və keyfiyyət təminatı üzrə birgə fəaliyyət perspektivləri müzakirə olunub. Həmçinin gələcəkdə müəllim-tələbə mübadiləsi və birgə elmi-mədəni tədbirlərin təşkili ilə bağlı fikir mübadiləsi aparılıb.
Görüşlərin əsas müzakirə mövzularından biri də ali təhsil və incəsənət sahəsində süni intellekt texnologiyalarının tətbiqi, rəqəmsal transformasiyanın idarə olunması və tədris prosesində innovativ alətlərdən istifadə məsələləri olub. Süni intellektin yaradıcı sənayelərə və təhsilə inteqrasiyası istiqamətində ortaq elmi yanaşmaların tətbiqi və ortaq layihələrin hazırlanmasının əhəmiyyəti vurğulanıb.