2025/2026-cı tədris ilində Bakı Dövlət Universitetinin (BDU) Şərqşünaslıq fakültəsinin 4 tələbəsi Küveyt Dövlətinin təqaüd proqramı çərçivəsində Küveyt Universitetinin Dillər Mərkəzində ərəb dilinin təkmilləşdirilməsi kursunda iştirak edib.
“Tehsil365” xəbər verir ki, BDU-nun Şərqşünaslıq fakültəsinin “Filologiya (ərəb dili və ədəbiyyatı)” ixtisası üzrə təhsil alan Jalə Novruzova, “Tərcümə (ərəb dili)” ixtisasının tələbəsi Sidiqə Feyzullayeva, “Regionşünaslıq (ərəb ölkələri üzrə)” ixtisası üzrə təhsil alan Səbinə Cəbrayılova və Nərmin Abbasova bir il müddətində Küveyt Universitetinin Dillər Mərkəzində ərəb dili üzrə bilik və bacarıqlarını təkmilləşdiriblər. Təhsil proqramını uğurla başa vuran tələbələr Azərbaycana qayıdıblar. Proqram çərçivəsində tələbələr beynəlxalq təhsil mühitində təcrübə qazanıb, ərəb ölkələrinin dili və mədəniyyəti ilə yaxından tanış olublar.
Qeyd edək ki, tələbələr Elm və Ali Təhsil üzrə Dövlət Agentliyinin təqdim etdiyi namizədlər siyahısından seçilərək Küveyt Dövlətinin təqaüd proqramına layiq görülüblər. Proqram çərçivəsində tələbələrin təhsil və yaşayış xərcləri, həmçinin beynəlxalq nəqliyyat xərcləri Küveyt Dövləti tərəfindən qarşılanıb.