“Bəzi tarixlər var ki, sadəcə təqvimdə bir gün deyil. O tarixlər xalqın yaddaşında, insanların xatirələrində və qəlbində yaşayır.”
Bəzi tarixlər var ki, sadəcə təqvimdə bir gün deyil. O tarixlər xalqın yaddaşında, insanların xatirələrində və qəlbində yaşayır. 27 Sentyabr da Azərbaycan xalqı üçün belə tarixlərdəndir.
2020-ci il 27 Sentyabrında başlayan Vətən müharibəsi hər birimizin həyatında dərin iz buraxdı. Həmin gün Azərbaycan Ordusu işğal altında olan torpaqlarımızın azadlığı uğrunda mübarizəyə başladı. Qarşıda bizi 44 gün davam edəcək ağır, lakin şərəfli bir yol gözləyirdi.
Bu yol asan olmadı. Azərbaycan əsgəri böyük çətinliklərlə üz-üzə qaldı, amma Vətən sevgisi və torpağa bağlılıq ona güc verdi. Döyüş meydanında göstərilən qəhrəmanlıq, xalqımızın birliyi və həmrəyliyi nəticəsində uzun illər həsrətində olduğumuz torpaqlarımız azad edildi.
Bu gün həmin hadisələrdən danışarkən ilk növbədə şəhidlərimizi xatırlayırıq. Çünki qazandığımız Zəfərin ən böyük qiyməti onların canı oldu. Onlar öz həyatlarını Vətən üçün fəda etdilər və arxalarında silinməz bir iz qoydular.
Şəhidlər haqqında düşünəndə onların yalnız döyüş meydanındakı qəhrəmanlıqlarını deyil, geridə qoyduqları insanları da düşünmək lazımdır. Onların anaları, ataları, həyat yoldaşları, övladları, bacı-qardaşları və dostları var. Hər bir şəhidin arxasında bir ailənin böyük həsrəti, bir evin səssizliyi və heç vaxt unudulmayacaq bir xatirə var.
Qazilərimizin də bu tarixdə xüsusi yeri var. Onlar Vətən uğrunda döyüşərək sağlamlıqlarını itirdilər, ağır sınaqlardan keçdilər. Onların göstərdiyi fədakarlıq və cəsarət hər zaman hörmətlə xatırlanmalıdır.
27 Sentyabr bizə bir daha göstərdi ki, xalq olaraq birlikdə olduğumuz zaman qarşıya qoyduğumuz məqsədlərə doğru daha böyük inamla gedə bilərik. Müharibə günlərində insanların bir-birinə dəstək olması, əsgərlərimizin arxasında dayanması və Vətən sevgisinin hər yerdə hiss olunması həmin dövrün ən yaddaqalan məqamlarından biri idi.
Bu gün bizim üzərimizə düşən isə həmin Zəfərin və bu Zəfəri bizə yaşadan insanların xatirəsini qorumaqdır. Şəhidlərimizi yalnız müəyyən günlərdə deyil, hər zaman xatırlamalı, onların adlarını yaşatmalı və gələcək nəsillərə tanıtmalıyıq.
Çünki Vətən sevgisi yalnız sözlə ifadə olunmur. Vətənə sahib çıxmaq, onun tarixini bilmək, şəhidlərini unutmamaq, qazilərinə hörmət göstərmək və bizə əmanət olunan dəyərləri qorumaq da Vətənə olan sevginin bir hissəsidir.
27 Sentyabr həm ağrını, həm qüruru, həm də böyük bir Zəfəri özündə birləşdirən tarixdir. Bu tarix bizə nələri geridə qoyduğumuzu, hansı yoldan keçdiyimizi və bu gün sahib olduğumuz torpaqların necə böyük fədakarlıqlar hesabına qorunduğunu xatırladır.
Şəhidlərimizin həyatını geri qaytarmaq mümkün deyil. Amma onların xatirəsini yaşatmaq, ailələrinə hörmət göstərmək və Vətənə layiqli şəkildə xidmət etmək bizim əlimizdədir.
Azərbaycan Respublikasının gənc İctimai-Siyasi fəalı Surxay Ərəbli