Azərbaycan Dillər Universiteti (ADU) nəzdində fəaliyyət göstərən Türk Dünyası Araşdırmaları Mərkəzinin müdiri Cəlal İbrahimli Türkiyənin Ege Universitetində fəaliyyət göstərən Türk Dünyası Araşdırmaları İnstitutunu ziyarət edib.
Bu barədə “Tehsil365” bildirir ki, institutun müdiri Prof. Dr. Atıf Akgün ilə keçirilən görüşdə iki qurum arasında elmi və akademik əlaqələrin genişləndirilməsi, birgə layihələrin həyata keçirilməsi və ortaq tədbirlərin təşkili ilə bağlı fikir mübadiləsi aparılıb.
Görüşdə Türk dünyası ilə bağlı müxtəlif istiqamətlər üzrə birgə tədqiqatların aparılması, qarşılıqlı səfərlərin təşkili və elmi tədbirlərdə əməkdaşlıq məsələləri də nəzərdən keçirilib.
Görüş zamanı Türk Dünyası Araşdırmaları Mərkəzinin həyata keçirdiyi layihələrin Ege Universitetinin Türk Dünyası Araşdırmaları İnstitutu ilə birgə reallaşdırılması imkanları da diqqət mərkəzində olub. Bu çərçivədə “Türk Dünyası Əl Kitabı”, “Kaşqarlı Mahmud və Türk Dünyası”, “Türk Dünyasında Şeir”, “Türk Dünyasında Film, Dil və Tərcümə”, “Türk Dünyası Birliyi” və “Heydər Əliyev və Türk Dünyası” layihələri üzrə birgə elmi araşdırmaların aparılması, seminar, konfrans və digər elmi-mədəni tədbirlərin keçirilməsi imkanları müzakirə edilib.
Tərəflər Türk dünyasının ortaq elmi, mədəni və tarixi irsinin araşdırılması istiqamətində əməkdaşlığın genişləndirilməsinin vacibliyini qeyd ediblər. Azərbaycan və Türkiyə arasında mövcud elmi və akademik əlaqələrin yeni layihələrlə inkişaf etdirilməsinin “Bir millət, iki dövlət” anlayışının elm və təhsil sahəsində də möhkəmləndirilməsinə xidmət etdiyi vurğulanıb.
Yaxın dövrdə iki qurum arasında müzakirə olunan layihələr və əməkdaşlıq istiqamətləri üzrə birgə fəaliyyətlərin həyata keçirilməsi, eləcə də ortaq elmi və mədəni tədbirlərin təşkili nəzərdə tutulur.
