“Tehsil365” İnformasiya Agentliyinin layihəsi olan “Şəhidin səsi” proqramının növbəti buraxılışı Vətən müharibəsi şəhidi, qarmon müəllimi Zamin Rəhimovun əziz xatirəsinə həsr olunacaq.
"Tehsil365" xəbərə verir ki, buraxılış 5 oktyabr 2026-cı il tarixində saat 18:00-da yayımlanacaq. Proqramın aparıcısı “Tehsil365” İnformasiya Agentliyinin “Könüllü müxbir” layihəsində könüllü müxbir kimi fəaliyyət göstərən Ayşən Rəfizadə olacaq.
Zamin Vahid oğlu Rəhimov 21 aprel 1988-ci ildə Cəbrayıl rayonunun Məzrə kəndində anadan olub. 2006-cı ildə Binəqədi rayonunda fəaliyyət göstərən Sirik kənd tam orta məktəbini bitirdikdən sonra həqiqi hərbi xidmətə yollanıb və 2008-ci ildə xidmətini başa vurub. Şuşa Musiqi Texnikumunda qarmon ifası üzrə müəllim ixtisasına yiyələnən Zamin Rəhimov 2013-cü ildən Cəbrayıl rayon Mahmudlu kənd Uşaq Musiqi Məktəbində qarmon müəllimi kimi fəaliyyət göstərib.
2020-ci il sentyabrın 27-də başlayan Vətən müharibəsinə könüllü olaraq qatılan Zamin Rəhimov oktyabrın 7-də Cəbrayıl rayonu uğrunda gedən döyüşlərdə qəhrəmancasına şəhid olub. Ailəli olan şəhidimizin bir övladı yadigar qalıb. O, Binəqədi rayonu Biləcəri qəsəbəsində yerləşən qəbiristanlıqda dəfn edilib.
Zamin Rəhimov göstərdiyi igidlik və şücaətə görə ölümündən sonra “Vətən uğrunda”, “Cəbrayılın azad olunmasına görə”, “Füzulinin azad olunmasına görə” və “Cəsur döyüşçü” medalları, həmçinin 3-cü dərəcəli “Vətənə xidmətə görə” ordeni ilə təltif edilib.
“Şəhidin səsi” proqramının bu buraxılışında Zamin Rəhimovun həyat və döyüş yolu, müəllimlik fəaliyyəti, Vətənə bağlılığı və qəhrəmanlığı yad ediləcək, onun əziz xatirəsi ehtiramla anılacaq.
Qeyd edək ki, “Şəhidin səsi” layihəsinin əsas məqsədi Vətən uğrunda canından keçmiş şəhidlərimizin həyat və qəhrəmanlıq tarixini gələcək nəsillərə çatdırmaq, onların əziz xatirəsini yaşatmaqdır.