Cəmiyyətin inkişafı, fərdlərin formalaşması və gələcəyin sağlam təməllər üzərində atılması birbaşa müəllim peşəsi ilə bağlıdır. Müəllimlik sadəcə bilik ötürən bir sahə deyil, ruhu işıqlandıran, xarakter formalaşdıran və insanı həyata hazırlayan ali bir missiyadır. Hər il oktyabrın 5-də dünya miqyasında və ölkəmizdə Beynəlxalq Müəllimlər Günü təntənəli şəkildə qeyd olunur. Bu xüsusi gün müəllim əməyinin miqyasını, onun cəmiyyətdəki yerini bir daha xatırlamaq və bu müqəddəs peşə sahiblərinə dərin ehtiramı ifadə etmək üçün böyük imkandır.
Hər bir peşənin arxasında böyük bir müəllim əməyi durur. Müəllim gələcəyi bu gündən inşa edən gizli qəhrəmandır. O, yalnız fənləri öyrətmır, həm də dürüstlük, məsuliyyət, vətənpərvərlik və insanpərvərlik kimi fundamental mənəvi dəyərləri aşılayır.
Azərbaycan dövlətçilik tarixində təhsilə və müəllim şəxsiyyətinə həmişə müqəddəs bir münasibət olmuşdur. Ümummilli Lider Heydər Əliyev müəllim peşəsinin cəmiyyətdəki müqəddəs rolunu yüksək qiymətləndirərək "Mən yer üzündə müəllimdən yüksək ad tanımıram" demiş, hər birimizin qəlbində müəllimin hərarətli zərrəciyinin olduğunu vurğulamışdır. Prezident İlham Əliyev də təhsil sisteminin inkişafını dövlət siyasətinin prioritet istiqaməti hesab edərək təhsilin millətin gələcəyi olduğunu bildirmişdir.
Müəllim cəmiyyətin mənəvi kompasıdır, çünki o, yalnız fərdləri deyil, bütöv bir nəsli formalaşdırır. Savadlı, analitik düşünən və etik dəyərlərə sahib fərdlərdən ibarət cəmiyyətlər həmişə möhkəm olur. Müəllim adı sadəcə titul deyil, böyük məsuliyyət və şərəfdir.
Azərbaycan Dövlət Pedaqoji Universitetinin müəllimi, gənc alim
Gülöyşə Azadqızı