“Son illərdə universitet tələbələri daha çox akademik stress, təşviş, emosional yorğunluq və özünəinam problemləri ilə psixoloqlara müraciət edirlər”.
Bu sözləri “Tehsil365”ə açıqlamasında Xəzər Universitetinin Psixologiya Departamentinin əməkdaşı, “Xəzər Psixoloji Xidmət Mərkəzi”nin psixoloq-psixoterapevti Mirsadiq Muxtarov saytımıza açıqlamasında deyib.
O bildirib ki, tələbələr arasında akademik stress kifayət qədər geniş yayılıb və bu, təkcə imtahan həyəcanı ilə məhdudlaşmır:
“Yüksək nəticə gözləntiləri, valideynlərin təzyiqi, gələcək karyera ilə bağlı narahatlıqlar və özünü digər tələbələrlə müqayisə etmək ciddi psixoloji gərginlik yarada bilir. Bəzən tələbə yaxşı nəticə əldə etsə belə, özünü uğursuz və yetərsiz hesab edir.”
Psixoloqun sözlərinə görə, psixoterapiya üçün müraciət edən tələbələr arasında təşviş halları da geniş yayılıb.
“O bildirib ki, bəzi tələbələr gələcəklə bağlı həddindən artıq narahat olur, qərar verməkdə çətinlik çəkir və hər hansı uğursuzluğun gələcək həyatlarına ciddi təsir göstərəcəyindən qorxurlar. Bu vəziyyət uzun müddət davam etdikdə yuxuya, diqqətə, dərsə münasibətə və gündəlik fəaliyyətə mənfi təsir göstərə bilir.”
M.Muxtarov qeyd edib ki, sosial medianın təsiri nəticəsində gənclər özlərini başqaları ilə müqayisə etməyə daha çox meyllənirlər.
“Onlar başqalarının yalnız uğurlu və xoşbəxt görünən tərəfini gördükləri üçün özlərini kifayət qədər bacarıqlı və ya uğurlu hesab etməyə bilirlər.”
Psixoloq vurğulayıb ki, universitet dövrü gənclərin müstəqil həyata keçid mərhələsi olduğundan kimlik, gələcək planları və karyera seçimi ilə bağlı suallar da psixoloji gərginliyə səbəb ola bilir. Onun sözlərinə görə, ailədaxili problemlər, dostluq münasibətlərində yaşanan çətinliklər və romantik münasibətlərin sona çatması da tələbələrin emosional vəziyyətinə və akademik göstəricilərinə təsir edir.
Mirsadiq Muxtarov sonda tələbələrin psixoloji dəstəyə vaxtında müraciət etməsinin vacibliyini vurğulayıb.
“Psixoloqa müraciət etmək üçün mütləq ciddi problem yaşamaq lazım deyil. Bəzən insan sadəcə yaşadığı çətinliyi daha yaxşı anlamaq, özünü toparlamaq və düzgün qərar vermək üçün də psixoloji dəstəyə ehtiyac duyur. Universitetlərdə tələbələrin emosional savadlılığının, stresslə mübarizə bacarıqlarının və psixoloji dayanıqlığının inkişafına daha çox diqqət yetirilməlidir.”