Azərbaycan Dillər Universiteti (ADU) nəzdində fəaliyyət göstərən Türk Dünyası Araşdırmaları Mərkəzinin müdiri Cəlal İbrahimli Ege Universitetinə səfər edib.
Bu barədə “Tehsil365”ə ADU-dan bildirilir ki, səfər çərçivəsində Ege Universitetinin Ədəbiyyat fakültəsinin dekanı, professor Selami Fedakar və Türk Dünyası Araşdırmaları İnstitutunun nümayəndələri ilə görüşlər keçirilib.
Görüşlərdə türk dünyası üzrə elmi araşdırmaların inkişaf etdirilməsi, akademik əlaqələrin genişləndirilməsi və birgə layihələrin həyata keçirilməsi məsələləri müzakirə olunub.
Həmçinin Türk Dünyası Araşdırmaları Mərkəzinin fəaliyyəti və həyata keçirdiyi “Türk Dünyası Birliyi”, “Türk Dünyasında Şeir”, “Türk Dünyası Dil, Film və Tərcümə”, “Türk Dünyası Əl Kitabı”, “Kaşğarlı Mahmud Yolu və Türk Dünyası” və “Heydər Əliyev və Türk Dünyası” layihələri barədə məlumat verilib.
Tərəflər türk dünyasının dili, ədəbiyyatı və mədəni irsinin araşdırılması, birgə elmi tədqiqatların aparılması, ortaq nəşrlərin hazırlanması və elmi-mədəni tədbirlərin təşkili istiqamətində əməkdaşlığın genişləndirilməsi barədə fikir mübadiləsi aparıblar.
Səfər Türk Dünyası Araşdırmaları Mərkəzi ilə Ege Universiteti arasında elmi və mədəni əlaqələrin inkişaf etdirilməsi, həmçinin gələcək birgə layihələr üçün yeni əməkdaşlıq imkanlarının müəyyənləşdirilməsi baxımından əhəmiyyət daşıyıb.