5 Oktyabr – Beynəlxalq Müəllimlər Günü münasibətilə Azərbaycan Dillər Universitetində (ADU) “Müəllim – gələcəyə işıq saçan insan” adlı tədbir keçirilib.
“Tehsil365”xəbər verir ki, tədbir pedaqogika üzrə fəlsəfə doktoru, dosent Sevinc Hüseynovanın rəhbərlik etdiyi Xarici Dillərin Tədrisi Metodikası kafedrası və filologiya üzrə fəlsəfə doktoru, dosent Şəmsinur Aslanovanın rəhbərlik etdiyi Avropa Dilləri kafedrasının birgə təşkilatçılığı ilə baş tutub.
Tədbirdə Filologiya fakültəsinin dekanı dosent Aynur Budaqova, kafedra müdirləri, professor-müəllim heyəti, tələbələr və qonaqlar iştirak ediblər.
Əvvəlcə Azərbaycan Respublikasının Dövlət Himni səsləndirilib. Daha sonra müəllimlik peşəsinin cəmiyyətin inkişafındakı rolu və müəllim əməyinin əhəmiyyəti vurğulanıb.
Çıxışlarda qeyd olunub ki, müəllim yalnız bilik verən şəxs deyil, eyni zamanda tələbənin dünyagörüşünün formalaşmasına, onun düşünmə, araşdırma və özünəinam bacarıqlarının inkişafına istiqamət verən, gələcəyin formalaşmasında mühüm rol oynayan şəxsdir.
Tədbir çərçivəsində tələbələrin iştirakı ilə “Müəllim kimdir?” mövzusunda çıxış, müəllimlərə həsr olunmuş şeir, musiqi fasiləsi və tələbələr tərəfindən hazırlanmış videoçarx nümayiş etdirilib. Həmçinin müəllimlərlə “Müəllimə 5 sual” formatında maraqlı söhbət aparılıb.
Tədbirin əsas hissəsində müəllimlik peşəsinin mahiyyəti, müasir müəllimin qarşısında duran vəzifələr və tələbə-müəllim münasibətlərinin əhəmiyyəti barədə fikirlər səsləndirilib. Bildirilib ki, müəllim üçün ən böyük mükafat tələbəsinin uğurudur.
Sonda tələbələr tərəfindən müəllimlərə ünvanlanan təşəkkür məktubu oxunub, bütün müəllimlər təbrik edilib və onlara pedaqoji fəaliyyətlərində yeni uğurlar arzulanıb.
