Oktyabrın 6-da Azərbaycan Dillər Universitetinin (ADU) Təhsil fakültəsində Orhun Mübadilə Proqramı çərçivəsində “Sinfin idarə olunması” mövzusunda təlim keçirilib.
“Tehsil365”xəbər verir ki, təlim Türkiyə Respublikasının Fırat Universitetinin professorları Prof. Dr. Mukadder Boyrak Özan, Prof. Dr. Mehmet Nuri Gömleksiz və Suheyla Demirkol Orak tərəfindən aparılıb.
Təlimdə Təhsil fakültəsinin dekanı dos. Firuzə Rzayeva, Psixologiya və pedaqogika kafedrasının müdiri dos. İranə Məmmədli, Rus dili və ədəbiyyatı kafedrasının müdiri prof. Məmməd Əliyev, Təhsildə xarici dillər kafedrasının müdiri dos. Həqiqət Hacıyeva və fakültənin digər müəllimləri iştirak ediblər.
Təlim çərçivəsində sinfin səmərəli idarə olunmasının əsas prinsipləri, effektiv idarəetmə üsulları, müəllim-tələbə münasibətlərinin düzgün qurulması və əlverişli təlim mühitinin yaradılması mövzularında müzakirələr aparılıb.
İnteraktiv formatda keçən təlimdə iştirakçılar təcrübələrini bölüşüb və aktual məsələlərin həlli yolları ətrafında fikir mübadiləsi aparıblar.