Dövlət İmtahan Mərkəzi (DİM) və Azərbaycan Respublikasının Baş Prokurorluğunun birgə təşkilatçılığı ilə prokurorluq orqanlarında işə qəbul olmaq istəyən namizədlər üçün test imtahanı keçiriləcək.
“Tehsil365” xəbər verir ki, imtahan 9 oktyabr 2026-cı il tarixində keçiriləcək və imtahanda iştirak etmək üçün 325 namizəd qeydiyyatdan keçib.
İmtahan DİM-in elektron imtahanlar korpusunda – Bakı şəhəri, Binəqədi rayonu, S.S. Axundov küçəsi 50 ünvanında, TÜRKPA-nın yaxınlığında elektron formada təşkil olunacaq.
Namizədlər “İmtahana buraxılış vərəqəsi”ni DİM-in “Aktual elektron imtahanlara qeydiyyat və buraxılış vərəqələrinin çapı” xidməti vasitəsilə əldə edə bilərlər.
İmtahana gələn şəxslər şəxsiyyət vəsiqəsinin əslini və “İmtahana buraxılış vərəqəsi”ni təqdim etməlidirlər. Sənədlərdən hər hansı biri olmadıqda və ya sənədlər arasında uyğunsuzluq aşkarlandıqda namizəd imtahana buraxılmayacaq.
İmtahan saat 10:00-da başlayacaq. Namizədlər imtahanı başa çatdırdıqdan və ya ayrılmış vaxt tamamlandıqdan sonra nəticələri ilə tanış ola biləcəklər. Nəticələr növbəti gün DİM-in rəsmi saytında da yerləşdiriləcək.