“Məktəbdə nizam-intizamın, vahid geyim formasının və dünyəvi təhsil prinsiplərinin qorunmasının vacibliyini anlayıram. Lakin hesab edirəm ki, şagirdin geyiminə münasibətdə tətbiq olunan qaydalar bütün hallarda eyni və obyektiv prinsiplərə əsaslanmalıdır.”
Bu sözləri “Tehsil365”ə açıqlamasında təhsil eksperti Əli Ələkbərov deyib.
Ekspert bildirib ki, Bu gün məktəblərimizdə şagirdlərin makiyajdan istifadə etməsi, məktəb formasına uyğun olmayan qısa ətəklər geyinməsi, qarın və bədən hissəsini açıq saxlayan geyimlərdən istifadə etməsi kimi hallarla da rastlaşmaq mümkündür.
O zaman sual yaranır: əgər məqsəd məktəb mühitində vahidlik, səliqə və təhsil müəssisəsinə uyğun geyim qaydası yaratmaqdırsa, niyə müzakirə yalnız hicab üzərində cəmlənməlidir?
Ə.Ələkbərov qeyd edib ki,Hicab məktəbi hansı baxımdan pis vəziyyətə salır?
Əgər bir şagird məktəb formasının üzərinə hicab taxırsa və bu, onun dərs prosesinə, təhsil almasına və digər şagirdlərin hüquqlarına mane olmursa, bu məsələyə yalnız dini simvol kimi yanaşmaq nə dərəcədə doğru yanaşmadır?
“Məncə, məktəb şagirdin biliyini, davranışını, intizamını və təhsilə münasibətini ön plana çıxarmalıdır. Geyim qaydaları isə dini, dünyəvi və ya başqa fərqliliklərə görə ayrı-seçkilik yaratmadan, bütün şagirdlərə eyni prinsiplərlə tətbiq olunmalıdır.
“Əgər makiyaj, məktəb formasına uyğun olmayan geyim, həddindən artıq qısa ətək və digər forma pozuntuları məktəb mühiti üçün uyğun hesab edilmirsə, bunlarla bağlı da aydın və hamıya eyni şəkildə tətbiq olunan qaydalar olmalıdır.
Məsələ hicabın olub-olmaması deyil. Məsələ məktəbdə qaydaların necə və hansı prinsip əsasında tətbiq edilməsidir.
“Təhsil müəssisəsi fərqliliklərin qarşıdurma yaratdığı deyil, fərqli insanların bir-birinə hörmət etməyi öyrəndiyi məkan olmalıdır.
“Bu səbəbdən hesab edirəm ki, geyim qaydaları hazırlanarkən əsas meyar şagirdin dini və ya şəxsi seçimi deyil, məktəb mühitində təhsil prosesinin, nizam-intizamın və qarşılıqlı hörmətin təmin olunması olmalıdır.”