ABŞ-də təxminən 9 min yeniyetmə üzərində aparılan araşdırma erkən yaşda smartfon istifadəsi ilə qidalanma pozuntusu əlamətləri arasında əlaqə olduğunu göstərib.
“Tehsil365” “AzEdu.az” a istinadən xəbər verir ki, Kaliforniya Universitetinin San-Fransisko filialının (UCSF) alimlərinin araşdırmasına görə, 12 yaşında smartfonu olan uşaqların qidalanma pozuntusu əlaməti bildirmə ehtimalı 36 faiz, həddindən artıq yemə əlamətləri isə 61 faiz daha yüksək olub. Araşdırmaya qatılan 12 yaşlı uşaqların təxminən 70 faizinin smartfonu olduğu müəyyənləşdirilib.
Tədqiqatın nəticələri JAMA Network Openjurnalında dərc olunub. Araşdırmaya əsasən, 12 yaşından smartfon istifadə edən uşaqlarda 14 yaşında qidalanma pozuntusu əlamətləri bildirmə riski 49 faiz, öz dəyərini çəkisi ilə əlaqələndirmə ehtimalı isə 103 faiz daha yüksək olub.
Tədqiqatçılar erkən və nəzarətsiz sosial media istifadəsinin bədən görünüşündən narazılığı artıra biləcəyini bildiriblər. Xüsusilə idealizə edilmiş bədən görüntüləri və “fitspiration” paylaşımlarının gənclərin qidalanma davranışlarına mənfi təsir göstərə biləcəyi vurğulanıb.
Araşdırma smartfon istifadəsinin qidalanma pozuntularına birbaşa səbəb olduğunu sübut etmir. Bununla belə, mütəxəssislər uşaqlara smartfon verilməsi yaşının və onların sosial media istifadəsinə nəzarətin diqqətlə nəzərdən keçirilməsini tövsiyə edirlər.