Türkmənbaşı şəhərində keçirilən MDB Ölkələrinin Milli Kulinariya Festivalı çərçivəsində Azərbaycanın milli mətbəxi, zəngin qastronomiya ənənələri və xalq sənətkarlığı nümunələri nümayiş etdirilib. Festival məkanını ziyarət edən Prezident İlham Əliyev ölkəmizin milli pavilyonu ilə tanış olub.
Oktyabrın 8-də Azərbaycan Prezidenti İlham Əliyev Türkmənbaşı şəhərində təşkil olunan MDB Ölkələrinin Milli Kulinariya Festivalına baş çəkib.
Festival Türkmənistanın 2026-cı ildə MDB-yə sədrliyi çərçivəsində keçirilən tədbirlər proqramına daxildir. Tədbirdə səkkiz ölkə iştirak edir.
Azərbaycan Mədəniyyət Nazirliyi və Dövlət Turizm Agentliyinin birgə təşkilatçılığı ilə yaradılan milli pavilyon iki hissədən ibarətdir. Pavilyonun kulinariya bölməsində Azərbaycanın milli mətbəxi, zəngin qastronomiya ənənələri, müxtəlif bölgələrə məxsus bitki, meyvə, taxıl, çərəz və digər yerli məhsullar nümayiş etdirilir. Burada, həmçinin UNESCO-nun Qeyri-Maddi Mədəni İrs Siyahısına daxil edilmiş Azərbaycan çay mədəniyyəti də ziyarətçilərə təqdim olunur.
Pavilyonun digər hissəsində isə xalçaçılıq, kəlağayıçılıq, misgərlik, ağac üzərində oyma və keramika sənəti nümunələri sərgilənir. Azərbaycan Milli Xalça Muzeyinin ekspozisiyası əsasında XIX əsr Qarabağ evinin interyeri də burada canlandırılıb.
Tədbir zamanı azyaşlı xanəndələrin ifasında Azərbaycan musiqisi və muğam nümunələri səsləndirilib.
Həmin gün Türkmənistan Prezidenti Sərdar Berdiməhəmmədovun adından rəsmi qəbul təşkil olunub və konsert proqramı təqdim edilib. Azərbaycan Prezidenti İlham Əliyev qəbulda və konsert proqramında iştirak edib.