Mədəniyyət Nazirliyi Mədəniyyət üzrə Elmi-Metodiki və İxtisasartırma Mərkəzinin (MEMİM) “Dilimiz milli-mədəni kimliyimizin təməlidir” adlı silsilə seminarlardan ibarət layihəsi davam edir.
“Tehsil365” xəbər verir ki, Oktyabrın 8-də Azərbaycan Milli Kitabxanasında Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzinin (MEMİM) “Dilimiz milli-mədəni kimliyimizin təməlidir” layihəsi çərçivəsində növbəti seminar keçirilib.
MEMİM-in məlumatına görə, tədbirin qonağı Xalq şairi və ictimai-siyasi xadim Sabir Rüstəmxanlı olub.
Azərbaycan Milli Kitabxanasının direktoru, professor Kərim Tahirov çıxışında Sabir Rüstəmxanlının yaradıcılığı ilə ölkədə ədəbi-ictimai fikrin inkişafına mühüm töhfələr verdiyini bildirib. O, Xalq şairini Azərbaycan dilinin ən fəal təəssübkeşlərindən biri kimi xarakterizə edib.
MEMİM-in direktoru, sənətşünaslıq üzrə fəlsəfə doktoru, dosent Vüqar Hümbətov isə Sabir Rüstəmxanlını 80 illik yubileyi və bu ilin may ayında Prezidentin Sərəncamı ilə “Şərəf” ordeni ilə təltif olunması münasibətilə təbrik edib. O, layihənin “Azərbaycan Mədəniyyəti – 2040” Konsepsiyasının hədəflərinə uyğun olaraq Azərbaycan dilinin milli mədəniyyətdəki rolunun gücləndirilməsi və mediada ana dilindən düzgün istifadənin təşviqi məqsədilə həyata keçirildiyini vurğulayıb.
Sabir Rüstəmxanlı çıxışında ana dilinin xalqın milli kimliyinin formalaşması və tarixi yaddaşının qorunmasında mühüm rol oynadığını bildirib. O, qloballaşma dövründə Azərbaycan dilinin və milli-mədəni dəyərlərin qorunmasının vacibliyini qeyd edib.
Seminar çərçivəsində şair iştirakçıların suallarını cavablandırıb. Şairin yaradıcılığına həsr olunmuş “Dil, kimlik, Vətən” kitabının müəllifi Şəhla Aslan layihənin əhəmiyyətini yüksək qiymətləndirərək təşkilatçılara təşəkkürünü bildirib.
Tədbirin bədii hissəsində aşıq Əli Zeynalabdinov, Beynəlxalq Muğam Mərkəzinin solisti Hüseyn Məlikov və muğam üçlüyü musiqi nömrələri təqdim ediblər. Bədii qiraətçi Hüseynağa Aslanov isə Sabir Rüstəmxanlının “Sağ ol, ana dilim” şeirini səsləndirib.
Fariz Yunislinin moderatorluğu ilə keçirilən seminarda Mədəniyyət Nazirliyinin tabeliyində fəaliyyət göstərən müəssisələrin ictimaiyyətlə əlaqələr üzrə əməkdaşları və digər qonaqlar iştirak ediblər.
Tədbirin sonunda MEMİM adından Sabir Rüstəmxanlıya 80 illik yubileyi münasibətilə xatirə hədiyyəsi təqdim olunub.