Bakı Dövlət Universitetinin (BDU) Keyfiyyət Təminatı Mərkəzinin təşkilatçılığı ilə “Liderlik və idarəetmə bacarıqları” mövzusunda ikigünlük təlim keçirilib.
“Tehsil365”xəbər verir ki, BDU rektorunun müşaviri Asiman İlyasovun apardığı təlimdə universitet əməkdaşları ilə yanaşı, müxtəlif təhsil müəssisələrinin nümayəndələri də iştirak edib.
Təlimin əsas məqsədi iştirakçıların liderlik və idarəetmə kompetensiyalarının inkişaf etdirilməsi, effektiv idarəetmə yanaşmaları barədə biliklərin genişləndirilməsi, kommunikasiya, komanda işi və qərar qəbuletmə bacarıqlarının təkmilləşdirilməsi olub.
Təlim çərçivəsində müasir liderlik nəzəriyyələri, effektiv idarəetmənin prinsipləri, komandanın formalaşdırılması və motivasiyası, effektiv kommunikasiya, qərar qəbuletmə mexanizmləri, konfliktlərin idarə olunması və situativ idarəetmə mövzuları praktiki nümunələr, interaktiv müzakirələr və situasiya əsaslı tapşırıqlarla izah olunub.
Vurğulanıb ki, müasir liderlik yalnız inzibati qərarlarla məhdudlaşmır. Effektiv lider əməkdaşların potensialını üzə çıxarmalı, motivasiyanı yüksəltməli, etimada əsaslanan mühit yaratmalı və təşkilatın strateji məqsədlərinə nail olmaq üçün komandanın gücündən səmərəli istifadə etməlidir.
Sonda iştirakçıların sualları cavablandırılıb və biliklərin praktiki tətbiqi barədə fikir mübadiləsi aparılıb.
