Bakı Dövlət Universitetinin (BDU) İnformasiya və sənəd menecmenti fakültəsində “Mədəni irs və rəqəmsal informasiya mühiti” mövzusunda elmi seminar keçirilib.
“Tehsil365 “xəbər verir ki, seminarda BDU-nun Sənəd menecmenti kafedrasının müdiri, dosent Nadir İsmayılov məruzə ilə çıxış edib.
Məruzəçi Ümummilli Lider Heydər Əliyevin mədəni irsin qorunmasındakı müstəsna xidmətlərini vurğulayaraq, bu siyasətin Prezident İlham Əliyev tərəfindən uğurla davam etdirildiyini bildirib. Qeyd olunub ki, işğaldan azad edilmiş ərazilərdə dağıdılmış mədəni irs nümunələrinin bərpası və milli sərvətlərin beynəlxalq səviyyədə tanıdılması istiqamətində mühüm işlər görülür. Həmçinin Birinci vitse-prezident Mehriban Əliyevanın rəhbərlik etdiyi Heydər Əliyev Fondunun milli-mənəvi dəyərlərin qorunmasına misilsiz töhfələr verdiyi diqqətə çatdırılıb.
Nadir İsmayılov BDU-da bu istiqamətdə görülən işlərdən danışaraq, ötən il universitetdə Mədəni İrsi Araşdırmalar Mərkəzinin yaradıldığını bildirib. Onun sözlərinə görə, mərkəz mədəni irsin elmi tədqiqi, sistemli araşdırmaların aparılması və elmi-kütləvi nəşrlərin hazırlanması baxımından mühüm əhəmiyyət daşıyır.
Seminarda mədəni irsin qorunması, rəqəmsallaşdırılması və gələcək nəsillərə ötürülməsində müasir informasiya-kommunikasiya texnologiyalarının yaratdığı imkanlar müzakirə olunub. Vurğulanıb ki, əlyazmaların, nadir kitabların, arxiv sənədlərinin, muzey eksponatlarının və tarixi-memarlıq abidələrinin rəqəmsal surətlərinin yaradılması onların fiziki təhlükələrdən qorunmasına və elmi dövriyyəyə daha geniş cəlb edilməsinə imkan verir.
Eyni zamanda Azərbaycanda mədəni irsin qorunması sahəsində formalaşmış milli qanunvericilik bazası və mövcud hüquqi mexanizmlər şərh edilib.
Elmi seminar müzakirələrlə davam edib.