Respublika Gözdən Əlillər Kitabxanasının fonduna yazıçı Vüsal Cəbrayılovun “Ölümün bəxş etdiyi həyat” romanı daxil olub.
“Tehsil365”xəbər verir ki, nəşrin kitabxanaya təqdim edilməsi kitabların daha geniş oxucu auditoriyasına çatdırılması və görmə məhdudiyyətli şəxslər üçün əlçatanlığının artırılması baxımından əhəmiyyət daşıyır.
Kitabın fonda daxil olması “Kitabsevərdən kitabxanaya” təşəbbüsünün məqsədləri ilə səsləşir. Təşəbbüsün əsas istiqamətlərindən biri vətəndaşların bağışladıqları nəşrlərin kitabxananın səsyazma studiyasında səsləndirilməsi və görmə məhdudiyyətli oxucular üçün səsli kitab resurslarının zənginləşdirilməsidir.
Müəllif Vüsal Cəbrayılov 17 iyul 1985-ci ildə Sumqayıt şəhərində anadan olub, əslən Cəbrayıl rayonundandır. Orta təhsilini Sumqayıt “İstedad” liseyində, ali təhsilini Bakı Dövlət Universitetinin Hüquq fakültəsində alıb. Uzun illər hüquq-mühafizə və vergi orqanlarında çalışıb.
“Ölümün bəxş etdiyi həyat” müəllifin ilk bədii əsəridir. Roman həyat müşahidələri, şəxsi düşüncələr və bədii təxəyyülün vəhdəti əsasında qələmə alınıb. Qeyd edək ki, roman əsasında “Ölümün verdiyi həyat” adlı film də çəkilib.
Kitabxana “Kitabsevərdən kitabxanaya” təşəbbüsü çərçivəsində kitabsevərləri kitab bağışlamağa dəvət edir.
Qeydiyyat: https://forms.gle/xeMaKm6PgiRqm3H38
Ünvan: Akademik Həsən Əliyev küçəsi 298–300
Əlaqə: 012 564 82 08, 077 333 78 98