Naxçıvan Dövlət Universitetində (NDU) Beynəlxalq Mədəni Diplomatiya Forumu keçirilib.
“Tehsil365” xəbər verir ki, forum NDU-nun tərəfdaşlığı, Ərzurum Böyükşəhər Bələdiyyəsinin himayəsi, Ərzurum Diplomatiya Araşdırmaları Mərkəzi Dərnəyinin təşkilatçılığı, Türkiyənin Naxçıvandakı Baş Konsulluğu, Azərbaycanın Qarsdakı Baş Konsulluğu və Yunus Əmrə İnstitutunun iştirakı ilə baş tutub.
Tədbirdə şəhidlərin xatirəsi bir dəqiqəlik sükutla yad edilib, Azərbaycan və Türkiyənin dövlət himnləri səsləndirilib.
Açılışda Türkiyə İqtisadiyyat və Xarici Siyasət Araşdırmaları Mərkəzinin sədri Ergün Engin NDU-nun türk tələbələrin təhsil aldığı mühüm ali təhsil müəssisəsi olduğunu vurğulayıb və akademik əməkdaşlığın əhəmiyyətinə diqqət çəkib.
NDU-nun rektoru Elbrus İsayev Azərbaycan və Türkiyə arasında tarixi-mədəni bağlılığın təhsil əməkdaşlığı ilə möhkəmləndiyini bildirib. O, türk professorların NDU-da tədrisə cəlb olunmasının və mobillik proqramlarının elm-təhsil əlaqələrinə töhfəsini qeyd edib.
Türkiyənin Naxçıvandakı Baş Konsulluğunun konsul müavini Ayşe Şengül Yıldırım forumun yeni dostluqların və mədəni layihələrin başlanğıcı olduğunu deyib.
Forum üç paneldə davam edib. Panellərdə ictimai diplomatiya, media və kommunikasiya, tarixi yaddaş, qeyri-maddi mədəni irsin qorunması, ortaq kimlik və rəqəmsal dövrdə mədəniyyətin təmsili müzakirə olunub.
Forum çərçivəsində ənənəvi türk teatr nümunələri “Orta oyunu” və “Karagöz və Hacivat” səhnəcikləri nümayiş etdirilib. “Karagöz və Hacivat” Naxçıvanda ilk dəfə səhnələşdirilib.
