“Universitetlərin tədris proqramında nəzəriyyə ilə yanaşı, praktik bacarıqların verilməsi, yumşaq bacarıqların inkişafı, eyni zamanda praktika, staj imkanları, könüllülük fəaliyyətləri tələbənin yetişməsinə müsbət təsir göstərər”.
Bu sözləri “Tehsil365”ə açıqlamasında Azərbaycan alimi, Əmək və Əhalinin Sosial Müdafiəsi Nazirliyinin tabeliyində Əmək Bazarı və Sosial Müdafiə Məsələləri üzrə Milli Observatoriyanın İdarə Heyətinin Sədrinin müavini Elçin Süleymanov bildirib.
Ekspert bildirib ki, universitetlərdə nəzəri biliklərlə yanaşı, praktik və yumşaq bacarıqların inkişafına da xüsusi diqqət yetirilməlidir. Onun sözlərinə görə, müasir əmək bazarında məzunların iş tapması üçün yalnız ixtisas biliklərinə sahib olması kifayət etmir. Analitik düşüncə, qərarvermə, liderlik, komanda ilə işləmək və rəqəmsal alətlərdən istifadə bacarıqları da mühüm əhəmiyyət daşıyır.
Elçin Süleymanov qeyd edib ki, əmək bazarının tələbləri sürətlə dəyişdiyindən universitetlərin tədris proqramları bu dəyişikliklərə uyğunlaşdırılmalı, məzunların məşğulluğu təhlil edilməli və işəgötürənlərlə əməkdaşlıq çərçivəsində tələbələrin çatışmayan bacarıqlarının inkişafı üçün sillabuslara müvafiq mövzular əlavə olunmalıdır:
“Bir marketinq mütəxəssisi SMM-də, sosial mediada vizuallaşdırma, müxtəlif alətlərdən istifadə bacarığı olmalıdır ki, iş tapa bilsin. Yəni, ixtisasların tələbləri sürətlə dəyişir”.
Təhsil eksperti onu da vurğulayıb ki, universitetlərin əmək bazarında baş verən hər bir dəyişikliyə uyğun olaraq tədris proqramlarını dərhal yeniləməsi real görünməsə də, bu prosesin mütəmadi şəkildə həyata keçirilməsi vacibdir. Bunun üçün məzunların məşğulluq vəziyyəti təhlil edilməli, onların iş həyatında qarşılaşdıqları çətinliklər araşdırılmalı və işəgötürənlərlə mütəmadi görüşlər keçirilməlidir. Bu görüşlər vasitəsilə məzunlarda çatışmayan bacarıqlar müəyyənləşdirilməli və həmin bacarıqların inkişaf etdirilməsi üçün tədris proqramlarına müvafiq mövzular əlavə olunmalıdır.