"Ədəbiyyat qəzeti"nin keçmiş baş redaktoru, şair, tənqidçi və ədəbiyyatşünas Ayaz Vəfalı 89 yaşında vəfat edib.
“Tehsil365”xəbər verir ki, o, 1937-ci il aprelin 1-də Cəlilabadın Sabirabad kəndində anadan olub. Azərbaycan Dövlət Universitetinin Filologiya fakültəsini bitirib.
Elmi fəaliyyətini Füzuli irsinin araşdırılmasına həsr edən Vəfalı 1972-ci ildə "Füzuli və folklor" mövzusunda dissertasiya müdafiə edib. "Füzuli öyrədir", "Sənətkar və xalq", "Füzuli xəlqiliyi" kimi fundamental əsərlərin müəllifidir. 1994-cü ildə onun rəhbərliyi ilə "Məhəmməd Füzuli" Beynəlxalq Ədəbi Əlaqələr Fondu təsis olunub.
50 ildən çox "Ədəbiyyat və incəsənət" qəzetində çalışan Ayaz Vəfalı milli ədəbi prosesin formalaşmasında mühüm rol oynayıb. Onun tərtib etdiyi "Ədəbiyyat qəzeti" biblioqrafiyası (1934-1964) mətbuat tariximiz üçün əvəzsiz mənbə hesab olunur.
O, həmçinin Konstantin Simonov, Taras Şevçenko, Əlişir Nəvai kimi sənətkarların əsərlərini Azərbaycan dilinə tərcümə edib. 2012-ci ildə dünya xalqlarının atalar sözlərindən ibarət "Atalar sözü – ağlın gözü" kitabı nəşr olunub.
Allah rəhmət eləsin!