Xətai Sənət Mərkəzində peşəkar rəssamların plener əsərlərindən ibarət sərgi açılıb.
“Tehsil365” xəbər verir ki, Mərkəzdən “AZƏRTAC”a bildirilib ki, tədbirdə Azərbaycan Rəssamlar İttifaqının sədr müavini, Xalq rəssamı Ağaəli İbrahimov çıxış edərək sərginin əhəmiyyətini vurğulayıb.
Açılış mərasimində Millət Məclisin deputatı, Əməkdar rəssam Ülviyyə Həmzəyeva, şair, publisist və Milli Məclisin Mədəniyyət komitəsinin eksperti Əkbər Qoşalı, Xətai Rayon İcra Hakimiyyətinin nümayəndəsi Turan Kərimzadə, rəssamlar İsmayıl Hacıyev və Bayram Qasımxanlı, eləcə də Xətai Sənət Mərkəzinin direktoru Zahid Əvəzov çıxış edərək öz təəssüratlarını bölüşüblər.
Mövzu və texnikası sərbəst olan sərgiyə 200-ə yaxın peşəkar rəssam tərəfindən 400-dən çox etüd əsəri təqdim edilib. Sərgidə yerli fırça ustaları ilə yanaşı Belarusdan, Qazaxıstan, Finlandiya, Əlcəzair və Hindistandan da rəssamlar iştirak edir.
Sərgidə daha çox fərqli dəst-xətin təqdim olunması məqsədilə seçimlər “bir rəssam – bir əsər” prinsipi əsasında aparılaraq 100 əsər, həmçinin qonaq rəssamların əsərləri nümayişə çıxarılıb. Əsəri sərgilənən iştirakçılara sertifikatlar təqdim olunub.
Qeyd edək ki, sərgidən 10 əsərin müəllifi xüsusi etüd turuna dəvət olunacaq.
Sərgi oktyabrın 12 və 13-də ziyarətçilərin üzünə açıqdır və giriş sərbəstdir.