Oktyabrın 14-də dövlət qulluğunda fəaliyyətin davam etdirilməsi üzrə test imtahanı keçiriləcək. İmtahanda iştirak etmək üçün 309 namizəd qeydiyyatdan keçib.
“Tehsil365” xəbər verir ki, bu barədə Dövlət İmtahan Mərkəzi (DİM) məlumat yayıb.
Bildirilib ki, imtahan inzibati rəhbər vəzifələrə aid AB və AC, eləcə də inzibati icraçı vəzifələrə aid BA və BB vəzifə altqrupları üzrə təşkil olunacaq.
İmtahan saat 10:00-da başlayacaq. Saat 09:45-dən sonra gələn namizədlər imtahana buraxılmayacaqlar.
Qeydiyyatdan keçən namizədlərdən 10 nəfəri AB, 16 nəfəri AC, 62 nəfəri BA, 221 nəfəri isə BB vəzifə altqrupu üzrə imtahanda iştirak edəcək.
İmtahanda iştirak edəcək şəxslər “İmtahana buraxılış vərəqəsi”ni DİM-in elektron xidmətləri vasitəsilə əldə edə bilərlər. Namizədlər imtahana gələrkən şəxsiyyətlərini təsdiq edən sənədin əslini və buraxılış vərəqəsini təqdim etməlidirlər.
Qeyd edək ki, göstərilən sənədlərdən hər hansı biri olmadıqda və ya sənədlər arasında uyğunsuzluq aşkarlandıqda namizəd imtahana buraxılmayacaq.