"Keçmiş dövrlərdə oxucu auditoriyası mütaliəyə daha çox vaxt ayıran, klassik ədəbiyyatı dərindən bilən və geniş dünyagörüşü ilə seçilən insanlardan ibarət olub. Belə oxucular təqdim olunan əsərlərin orijinallığını, ideya və üslub baxımından əvvəlki nümunələrdən fərqini asanlıqla müəyyən edə biliblər. Bu isə müəlliflər qarşısında daha ciddi tələblər qoyub, onları təkrarçılıqdan uzaq durmağa və keyfiyyətli məzmun yaratmağa sövq edib".
Bu sözləri “Tehsil365”ə açıqlamasında şair, yazıçı, kinodramaturq, Azərbaycan Yazıçılar Birliyinin Yaradıcılıq məsələləri üzrə katibi İlqar Fəhmi deyib. O bildirib ki, müasir dövrdə oxucu auditoriyasının yanaşması müəyyən qədər dəyişib.
“Əvvəlki dövrlərdə oxucu daha çox mütaliə edən, klassik əsərləri dərindən bilən və geniş dünyagörüşünə malik auditoriyadan ibarət idi. Belə oxucu hər hansı əsərin və ya yazının orijinallığını, əvvəlki nümunələrdən fərqini asanlıqla müəyyən edə bilirdi. Həmin dövrdə müəlliflər yazılarını təqdim edərkən daha diqqətli olmalı, təkrarçılıqdan və zəif yanaşmalardan uzaq durmalı idilər. Çünki oxucu plagiatı və keyfiyyətsiz işi tez bir zamanda ayırd edə bilirdi”, – deyə İlqar Fəhmi qeyd edib.
Yazıçı vurğulayıb ki, müasir dövrdə bəzi oxucuların əvvəlki dövrlərin ədəbiyyatı, mədəniyyəti və tarixi ilə kifayət qədər tanış olmaması təqdim olunan materialların yeniliyini müəyyənləşdirməyi çətinləşdirir.
“Bəzi yazarlar və jurnalistlər də bu vəziyyətdən istifadə edərək keçmişdə tətbiq olunmuş üslub və ideyaları yenidən işləyib yeni məhsul kimi təqdim edirlər. Belə materiallar isə çox vaxt oxucular tərəfindən maraqla qarşılanır. Əvvəllər yüksək tələblərə malik oxucu qarşısında hər hansı əsərlə uğur qazanmaq asan deyildi. Müasir dövrdə isə auditoriyanın məlumat bazasının dəyişməsi bəzi daha sadə və səthi məzmunların da populyarlaşmasına şərait yaradır”, – deyə o əlavə edib.