"Azərbaycanda peşə təhsilinin inkişafı əmək bazarının tələblərinə uyğun ixtisaslı kadrların hazırlanması və gənclərin məşğulluq imkanlarının genişləndirilməsi baxımından mühüm əhəmiyyət daşıyır. Bununla belə, peşə təhsilinə marağın artırılması üçün təhsil müəssisələrinin keyfiyyətinin yüksəldilməsi, cəmiyyətdə formalaşmış stereotiplərin aradan qaldırılması və universitet təhsilinin yeganə uğur yolu kimi qəbul edilməsi düşüncəsinin dəyişdirilməsi vacibdir".
Bu sözləri “Tehsil365”ə açıqlamasında təhsil eksperti Qoşqar Məhərrəmov deyib. O bildirib ki, Azərbaycanda peşə təhsilinin inkişafına mane olan əsas problemlərdən biri bu sahədə fəaliyyət göstərən müəssisələrin keyfiyyəti ilə bağlıdır.
“Düşünürəm ki, Azərbaycanda peşə təhsilinin inkişafına mane olan əsas problemlərdən biri peşə təhsili müəssisələrinin keyfiyyətinin aşağı olmasıdır. Əgər biz keyfiyyəti yüksəltsək, həmin müəssisələrin məzunları yaxşı iş yerləri ilə təmin olunsalar və bu, cəmiyyətdə geniş yayılsa, insanlar da rahatlıqla peşə təhsilinə yönələcəklər”, – deyə ekspert qeyd edib.
Qoşqar Məhərrəmovun sözlərinə görə, digər mühüm problem cəmiyyətdə peşə təhsilinə münasibətlə bağlıdır. Onun fikrincə, peşə məktəblərinin zəif oxuyan və ya akademik göstəriciləri aşağı olan şagirdlər üçün seçim kimi qəbul edilməsi uzun illərdir formalaşmış yanlış yanaşmadır.
“İnsanlar düşünürlər ki, savadsızdırsa və ya zəif oxuyursa, peşə təhsilinə getsin. Bu, əvvəlki dövrlərdən qalan düşüncədir. Halbuki bu yanaşmanı peşə təhsili müəssisələrinin tanıdılması, təbliği və inkişafının təmin edilməsi yolu ilə dəyişə bilərik”, – deyə o bildirib.
Ekspert vurğulayıb ki, peşə təhsilinə marağın artmasına mane olan amillərdən biri də cəmiyyətdə universitet təhsilinə verilən üstünlükdür. Onun fikrincə, bir çox insan ali təhsili uğurlu gələcəyin əsas şərti hesab edir və peşə təhsilinin daha qısa müddətdə əmək fəaliyyətinə başlamaq imkanı yaratdığını nəzərə almır.
“Hamı istəyir ki, universitetdə oxusun. Əgər insanlar görsələr ki, peşə təhsili müəssisəsində təhsil almaqla daha tez qazanc əldə etmək, əmək fəaliyyətinə başlamaq və bəzi hallarda universitet təhsilindən daha sərfəli nəticə əldə etmək mümkündür, bu tendensiya dəyişəcək və peşə təhsilinə yönələnlərin sayı artacaq”, – deyə Qoşqar Məhərrəmov qeyd edib.
Təhsil eksperti hesab edir ki, peşə təhsilinin inkişafı üçün üç əsas istiqamətə diqqət yetirilməlidir. Bunlar peşə təhsili müəssisələrinin keyfiyyətinin yüksəldilməsi, əhalinin bu təhsil pilləsinə münasibətinin dəyişdirilməsi və universitet təhsilinin mütləq zərurət kimi qəbul edilməsi düşüncəsinin aradan qaldırılmasıdır.
“Biz əsasən bu üç məsələyə fokuslanmalıyıq: peşə təhsili müəssisələrinin inkişaf etdirilməsi, əhalinin peşə təhsilinə qarşı baxışının dəyişdirilməsi və universitet təhsilinin olmazsa-olmaz olduğu düşüncəsinin aradan qaldırılması. Bu məsələlərə diqqət yetirsək, peşə təhsilinə yönəlmə artacaq, bu sahəyə daha rəqabətqabiliyyətli və bacarıqlı şagirdlər üz tutacaqlar”, – deyə ekspert fikrini yekunlaşdırıb.