Naxçıvan Dövlət Universitetində Yeni Azərbaycan Partiyasının VIII Qurultayından irəli gələn məsələlərə həsr olunan tədbir keçirilib.
“Tehsil365” xəbər verir ki, Tədbirdə Ümummilli Lider Heydər Əliyevin və Vətən uğrunda canlarından keçmiş şəhidlərin xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
NDU-nun rektoru Elbrus İsayev çıxışında YAP-ın dövlətçiliyin formalaşması və inkişafındakı rolundan danışıb. Rektor VIII Qurultayda Prezident İlham Əliyevin müəyyənləşdirdiyi inkişaf istiqamətlərinin əhəmiyyətini vurğulayıb, təhsil müəssisələrinin qarşısında duran vəzifələrə toxunub. O, vətənpərvərlik ruhunun gücləndirilməsi, kibertəhlükəsizliyə diqqətin artırılması və strateji hədəflərə uyğun fəaliyyətin vacibliyini qeyd edib.
YAP Naxçıvan Şəhər Təşkilatının sədri Elman Cəfərli və YAP Universitet ərazi partiya təşkilatının sədri Bəhruz Məmmədov çıxışlarında qurultaydan irəli gələn vəzifələr və fəaliyyət istiqamətləri barədə məlumat veriblər. Qurultayda müəyyənləşdirilən hədəflərin həyata keçirilməsində partiya üzvlərinin fəallığının və məsuliyyətli yanaşmasının əhəmiyyəti vurğulanıb.
Sonda YAP-a yeni qəbul olunan tələbələrə üzvlük vəsiqələri təqdim edilib. Tədbir partiyanın himninin səsləndirilməsi ilə başa çatıb.
