“Azərbaycanda dövlət informasiya sistemlərinin kibertəhlükəsizliyinin gücləndirilməsi məqsədilə “Bug Bounty” proqramı həyata keçiriləcək. Proqram çərçivəsində təhlükəsizlik boşluqlarını müəyyən edən iştirakçılar mükafatlandırılacaqlar”.
“Tehsil365” xəbər verir ki, bu barədə Xüsusi Rabitə və İnformasiya Təhlükəsizliyi Dövlət Xidməti məlumat yayıb.
Məlumata görə, proqram “QaraBug” platforması ilə əməkdaşlıq çərçivəsində təşkil olunur. “Bug Bounty” təşəbbüsünün əsas məqsədi informasiya sistemlərindəki mümkün təhlükəsizlik boşluqlarını vaxtında aşkarlamaq və onların aradan qaldırılmasına dəstək verməkdir.
Proqramın 20 oktyabr–15 noyabr 2026-cı il tarixlərində keçirilməsi nəzərdə tutulur. İştirakçılar müəyyən edilmiş qaydalar çərçivəsində sistemlərdəki təhlükəsizlik boşluqlarını araşdıraraq kibertəhlükəsizliyin gücləndirilməsinə töhfə verə biləcəklər.
Proqramın sonunda ən çox xal toplayan ilk üç iştirakçı pul mükafatı və sertifikatla təltif olunacaq.
Qeyd edək ki, “Bug Bounty” proqramları informasiya sistemlərindəki zəifliklərin məsuliyyətli şəkildə aşkarlanmasına və rəqəmsal təhlükəsizliyin artırılmasına xidmət edir.