Artıq bir aya yaxındır ki, universitetlərdə dərslər başlayıb. Bir sıra universitetlərimiz var ki, dərs saatlarını tələbələrin özləri müəyyənləşdirir - ADA, Xəzər, Lənkəran Dövlət Universiteti və s.
Maraqlıdır, bu təcrübə digər universitetlərimizdə də tətbiq oluna bilərmi?
“Tehsil365”Modern.az -a istinadən xəbər verir ki, AzEdu.az-a mövzu ilə bağlı təhsil məsələləri üzrə ekspert Vüsət Əzizov açıqlama verib.
O, bildirib ki, bu təcrübəni bütün universitetlərdə eyni vaxtda tətbiq etməkdənsə, əvvəlcə müəyyən fakültə və ixtisaslarda pilot layihə kimi sınaqdan keçirmək daha məqsədəuyğundur:
“Tələbələrin dərs saatlarını özlərinin müəyyənləşdirməsi təcrübəsi digər universitetlərdə də tətbiq oluna bilər. Lakin bunun üçün universitetlərin akademik imkanları, tədris proqramlarının xüsusiyyətləri və tələbələrin fərdi ehtiyacları nəzərə alınmalıdır
Ənənəvi təhsil modelində dərs cədvəli, əsasən, universitet tərəfindən müəyyənləşdirilir və tələbələr həmin cədvələ uyğunlaşmalı olurlar. Halbuki müasir ali təhsil sistemində tələbəyönümlü yanaşma getdikcə daha çox əhəmiyyət qazanır. Tələbələrə müəyyən seçim imkanlarının verilməsi onların vaxtlarını daha səmərəli planlaşdırmalarına, müstəqilliklərinin artmasına və təhsil prosesində məsuliyyətlərinin güclənməsinə şərait yarada bilər.
Xüsusilə işləyən, ailə öhdəlikləri olan və ya paralel şəkildə əlavə təlimlərdə iştirak edən tələbələr üçün bu model daha əlverişli ola bilər. Eyni zamanda, tələbələrin dərs saatlarını seçmək imkanının olması onların universitet təcrübəsindən məmnunluğunu da artıra bilər.
Amma burada bir məqamı nəzərə almaq lazımdır: tələbənin dərs saatını seçməsi istədiyi vaxt dərsə gəlməsi demək deyil. Bu proses universitetin müəyyən etdiyi akademik çərçivələr, qrup bölgüsü, auditoriyaların imkanları, müəllimlərin iş qrafiki və fənlərin ardıcıllığı əsasında təşkil olunmalıdır. Əks halda, dərs cədvəllərinin hazırlanmasında ciddi çətinliklər yarana bilər.
Bu təcrübəni bütün universitetlərdə eyni vaxtda tətbiq etməkdənsə, əvvəlcə müəyyən fakültə və ixtisaslarda pilot layihə kimi sınaqdan keçirmək daha məqsədəuyğundur. Bununla yanaşı, rəqəmsal dərs cədvəli sistemlərinin qurulması və tələbələrin seçimlərinin əvvəlcədən təhlil edilməsi vacibdir.
Əsas məsələ tələbələrə sadəcə seçim hüququ vermək deyil, bu seçimin keyfiyyətli təhsilə xidmət etməsini təmin etməkdir. Əgər universitetlər bu modeli düzgün təşkil edə bilsələr, tələbələrin fərdi ehtiyacları ilə tədrisin keyfiyyəti arasında daha sağlam balans yaratmaq mümkün olar. Ali təhsildə belə çevik modellərin tətbiqi müzakirə olunmalı və mərhələli şəkildə genişləndirilməlidir”.