Qara Qarayevin əsəri İsveç musiqi məktəbinin repertuarına daxil edilib . Azərbaycanın dünyaşöhrətli bəstəkarı Qara Qarayevin “Yeddi gözəl” baletindən “Adajio” əsərinin fortepiano və skripka üçün işlənmiş variantı İsveçin Katrineholm musiqi məktəbinin tədris proqramına daxil edilib.
“Tehsil365” xəbər verir ki, bu addım İsveçdə yaşayan həmyerlimiz, pianoçu Aynur Məlikovanın təşəbbüsü ilə həyata keçirilib.
“Azərbaycan klassik musiqisinin zənginliyini İsveçdə tanıtmaq və milli musiqi irsimizi yeni auditoriyaya təqdim etmək məqsədilə bu əsəri Katrineholm musiqi məktəbinin nümayəndələrinə notlar və rəqəmsal formatda göndərdim”, – deyə A.Məlikova bildirib.
Pianoçunun sözlərinə görə, Katrineholm musiqi məktəbinin rektoru Hanna Moen və skripka müəllimi Sara Karlsson əsəri dinlədikdən sonra onun musiqi gözəlliyindən, emosional dərinliyindən və təsir gücündən dərin təəssürat aldıqlarını bildiriblər.
“Mənim üçün bu təşəbbüs sadəcə bir musiqi əsərinin tədris proqramına daxil edilməsi deyil. Bu, Azərbaycan mədəniyyətinin beynəlxalq səviyyədə tanıdılması, Qara Qarayev kimi dahi sənətkarımızın yaradıcılığının İsveçdə gənc musiqiçilər nəslinə çatdırılması və musiqi vasitəsilə iki ölkə arasında mədəni körpünün qurulması deməkdir”, – deyə A.Məlikova qeyd edib.
Həmyerlimiz vurğulayıb ki, bu təşəbbüsün ən böyük dəyəri Azərbaycan musiqisinin öz dili ilə danışması, dinləyicilərin qəlbinə yol tapması və milli musiqi irsimizin başqa bir ölkənin təhsil mühitində özünə yer qazanmasıdır.
Bu, artıq Azərbaycan bəstəkarının İsveçdə musiqi tədrisinə daxil edilən ikinci əsəridir. Xatırladaq ki, daha əvvəl bəstəkar Arif Məlikovun “Komdenin arzuları” əsəri də İsveçin Lidinqö musiqi məktəbinin repertuarına daxil edilib.