Bakı Mühəndislik Universitetinin (BMU) Texnoparkı və Tələbə Elmi Cəmiyyətinin birgə təşkilatçılığı ilə birinci kurs tələbələri üçün Texnoparkın fəaliyyəti, startap ekosistemi, innovasiya və sahibkarlıq imkanlarına həsr olunan infosessiya keçirilib.
“Tehsil365” xəbər verir ki, tədbirdə BMU Texnoparkının texnoloji transfer mərkəzinin rəhbəri Bünyamin Seyidov təqdimatla çıxış edib. Təqdimatda Texnoparkın fəaliyyəti, müəllim və tələbələrin innovativ layihələrinin dəstəklənməsi, startap ideyalarının inkişaf etdirilməsi və kommersiyalaşdırılması imkanları barədə məlumat verilib. Həmçinin elmi və innovativ layihələrin sənaye müəssisələri ilə əlaqələndirilməsi, şirkətlərlə tərəfdaşlıq münasibətlərinin qurulması, inkubasiya proqramlarının startapların inkişafındakı rolu və Texnoparkın ölkənin innovasiya ekosisteminə inteqrasiyası məsələlərinə toxunulub.
Çıxış zamanı startapların yaradılması və inkişaf mərhələləri, növləri, maliyyələşmə mənbələri və biznes modelinin formalaşdırılması, eləcə də süni intellekt, proqramlaşdırma, enerji və ətraf mühit sahələrində startapların inkişaf perspektivləri diqqətə çatdırılıb. Eyni zamanda, dünyanın aparıcı startap mərkəzləri, qlobal startap ekosisteminin xüsusiyyətləri və 2026-cı il üzrə dünya startap bazarına dair statistik göstəricilər, habelə BMU Texnoparkında yaradılan imkanlar və həyata keçirilən layihələr də təqdim olunub.
Sonra “Bucard” startapının təsisçisi Ramin Əkbərov startaplar, innovasiya və sahibkarlıq mövzularında məruzə ilə çıxış edib. O, startap təşəbbüslərinin inkişafı, innovativ ideyaların biznes layihələrinə çevrilməsi və sahibkarlıq fəaliyyətinin əsas xüsusiyyətləri barədə fikirlərini bölüşüb.
Sonda tələbələrin sualları cavablandırılıb, onları maraqlandıran məsələlər ətrafında müzakirələr aparılıb.
Tədbir BMT-nin Dayanıqlı İnkişaf Məqsədlərinin 4-cü (Keyfiyyətli təhsil) və 9-cu (Sənaye, innovasiya və infrastruktur) məqsədlərinə uyğun olaraq təşkil edilib.