“Ali təhsil müəssisələrində təhsil alan qız tələbələr üçün “Vergi Akademiyası” proqramına sənəd qəbulu başlayıb”.
“Tehsil365” xəbər verir ki, proqram Elm və Təhsil Nazirliyi ilə İqtisadiyyat Nazirliyi yanında Dövlət Vergi Xidmətinin əməkdaşlığı çərçivəsində təşkil olunur.
Proqramın əsas məqsədi tələbələrin vergi sahəsində bilik və bacarıqlarını artırmaq, onların peşəkar inkişafına dəstək vermək və qadınların karyera imkanlarını genişləndirməkdir.
İştirakçılar vergi qanunvericiliyi və vergi inzibatçılığı üzrə nəzəri və praktiki biliklər əldə edəcək, həmçinin emosional intellekt və digər şəxsi bacarıqların inkişafına yönəlmiş təlimlərdə iştirak edəcəklər. Proqram çərçivəsində Dövlət Vergi Xidmətinin təcrübəli mütəxəssisləri ilə görüşlər də nəzərdə tutulur.
Proqramda iştirak etmək üçün Azərbaycan vətəndaşı olmaq, ali təhsil müəssisəsində qız tələbə kimi təhsil almaq, hüquq, iqtisadiyyat və ya idarəetmə istiqamətləri üzrə sonuncu kurs bakalavriat və ya magistraturanın birinci və ikinci kursunda oxumaq tələb olunur. Akademik göstəricilərlə bağlı əlavə şərtlər də müəyyən edilib.
Sənədlər 15 oktyabr saat 09:00-dan 15 noyabr 2026-cı il saat 23:59-dək vergiakademiyasi@taxes.gov.az elektron poçt ünvanına göndərilməlidir. Müraciətə şəxsiyyət vəsiqəsi, tələbə bileti, akademik transkript və CV əlavə olunmalıdır.
Proqram 2027-ci ilin yanvar-aprel aylarında keçiriləcək. Namizədlər sənədlərin yoxlanılması, özünü təqdimetmə videosunun qiymətləndirilməsi, eləcə də məntiq və dünyagörüşü üzrə qiymətləndirmə mərhələlərindən keçəcəklər.