“Azərbaycan Dövlət İqtisad Universitetinin (UNEC) alimlərinin ABŞ və Sloveniyadan olan tədqiqatçılarla birgə hazırladıqları elmi məqalə beynəlxalq jurnalda dərc olunub”.
“Tehsil365” xəbər verir ki, “Azərbaycan ali təhsil sistemində elmin beynəlmiləlləşməsinin institusionallaşdırılması” mövzusuna həsr olunan məqalə “Elsevier” nəşriyyatının Q1 kvartilli Social Sciences & Humanities Open jurnalında yayımlanıb.
Tədqiqatda Azərbaycanın ali təhsil müəssisələrində elmi fəaliyyət, beynəlxalq əməkdaşlıq və beynəlmiləlləşmə strategiyaları araşdırılıb.
Məqalənin müəllifləri UNEC Elmi fəaliyyətin təşkili şöbəsinin müdiri, Xanım Tədqiqatçılar Şurasının sədri, dosent Nərgiz Hacıyeva, ABŞ-ın Miçiqan Universitetinin professoru John Branch, Sloveniyanın Lyublyana Biznes Məktəbinin dosenti Katarina Askerc Zadravec və UNEC Biznes Məktəbinin müəllimi Səidə Xəlilidir.
Araşdırma çərçivəsində Azərbaycanın 26 ali təhsil müəssisəsinin 2019–2024-cü illər üzrə elmi fəaliyyəti “Scopus” və “SciVal” bazalarının məlumatları əsasında təhlil edilib. Nəticələrə görə, universitetlərdən yalnız 9-da, yəni 34,6 faizində beynəlmiləlləşmə üzrə rəsmi strategiya mövcuddur.
Tədqiqat zamanı beynəlxalq elmi əməkdaşlığın özlüyündə yüksək elmi təsirə zəmanət vermədiyi, universitet–sənaye əməkdaşlığının isə elmi nəşrlərin istinad göstəricilərinə daha güclü müsbət təsir göstərdiyi müəyyən edilib.
Müəlliflər beynəlxalq elmi əməkdaşlıq üzrə ixtisaslaşmış struktur bölmələrin yaradılmasını və elmin beynəlmiləlləşməsi üzrə milli strategiyanın hazırlanmasını tövsiyə ediblər.
Qeyd edək ki, məqalənin hazırlanması və beynəlxalq elmi rəy prosesinin tamamlanması təxminən iki il davam edib.