Oktyabrın 15-də “SABAH City” innovasiya şəhərciyində “Müasir dövrdə korroziya problemləri və həlli yolları” mövzusunda Beynəlxalq Elmi Konfrans öz işinə başlayıb.
“Tehsil365”xəbər verir ki, konfrans Ali Təhsil üzrə Dövlət Agentliyi və akademik Yusif Məmmədəliyev adına Neft-Kimya Prosesləri İnstitutunun birgə təşkilatçılığı ilə keçirilir.
Konfransın açılışında çıxış edən Neft-Kimya Prosesləri İnstitutunun direktoru, akademik Vaqif Abbasov korroziya problemlərinin neft-qaz sənayesi və digər sənaye sahələri üçün aktuallığını vurğulayıb. O, sənaye avadanlıqlarının etibarlı və uzunmüddətli istismarı üçün korroziyanın qarşısının alınmasının mühüm əhəmiyyət daşıdığını bildirib.
Açılış mərasimində AMEA-nın vitse-prezidenti, akademik Dilqəm Tağıyev, AMEA-nın akademik-katibi, akademik Arif Həşimov və Bakı Dövlət Universitetinin Üzvi kimya kafedrasının müdiri, akademik Abel Məhərrəmov da çıxış ediblər. Çıxışlarda fundamental və tətbiqi tədqiqatların, yeni inhibitorların və müasir mühafizə texnologiyalarının əhəmiyyəti qeyd olunub.
Azərbaycan Dövlət Neft və Sənaye Universitetinin rektoru, dosent Rüfət Əzizov konfransda “Neft-qaz sənayesində korroziya proseslərinin idarə olunması: empirik tədqiqat nəticələrinin təqdimatı” mövzusunda məruzə ilə çıxış edib.
İki gün davam edəcək konfrans panel sessiyalarla davam edir və oktyabrın 16-da başa çatacaq.