Oktyabrın 15-də Yaponiyanın Azərbaycandakı fövqəladə və səlahiyyətli səfiri Katsuya Vatanabe Azərbaycan Dillər Universitetinin qonağı olub.
“Tehsil365”xəbər verir ki, görüşdə ADU-nun rektoru, akademik Kamal Abdulla səfiri universitetdə görməkdən məmnun olduğunu bildirib.
Rektor qeyd edib ki, Yaponiya ilə Azərbaycan arasında mövcud dostluq münasibətləri təhsil və mədəniyyət sahəsində əməkdaşlığın genişləndirilməsi üçün əlverişli imkanlar yaradır. Universitetdə müxtəlif dillərin tədrisi ilə yanaşı, tələbələrin fərqli xalqların mədəniyyəti ilə tanış olması üçün geniş imkanların olduğu vurğulanıb.
Görüş zamanı ADU-da yapon dilinin tədrisi və Yaponiya mədəniyyətinin öyrənilməsi istiqamətində görülən işlər müzakirə olunub.
Yaponiyalı səfir səmimi qəbula görə təşəkkür edib, təhsil və mədəniyyət mübadiləsinin əlaqələrin inkişafında mühüm rol oynadığını bildirib.
Sonda səfir diplomatik missiyasının başa çatması ilə əlaqədar vidalaşıb və əlaqələrin bundan sonra da uğurla inkişaf edəcəyinə əminliyini ifadə edib.