Azərbaycan Dillər Universitetində “Bakı Şəbəkəsi” Araşdırmalar və Təhlil İctimai Birliyinin təşkilatçılığı ilə tələbələrlə görüş keçirilib.
“Tehsil365”xəbər verir ki, görüş “Zərərli xarici təsirlərə və saxta xəbərlərə qarşı sayıqlığın artırılmasına dəstək” layihəsi çərçivəsində, Qeyri-Hökumət Təşkilatlarına Dövlət Dəstəyi Agentliyinin dəstəyi ilə baş tutub.
Tədbirdə Trend BİA-nın direktor müavini Sahil Kərimli çıxış edərək zərərli xarici təsirlərə qarşı sayıqlığın vacibliyini vurğulayıb. O, Azərbaycana qarşı onlayn media və sosial şəbəkələrdə saxta məlumatların yayıldığını və bunun milli həmrəyliyə xələl gətirməyə yönəldiyini bildirib.
“Bakı Şəbəkəsi”nin sədri, əməkdar jurnalist Elçin Alıoğlu isə hibrid müharibələrdə dezinformasiyanın əsas vasitələrdən biri olduğunu qeyd edib. O, gəncləri sosial şəbəkələrdə məlumatlara tənqidi yanaşmağa çağırıb.
Görüşdə sosial şəbəkələrdə şəxsi məlumatların manipulyasiya məqsədilə istifadə oluna biləcəyi və informasiya təhdidlərinə qarşı hər bir vətəndaşın məsuliyyət daşıdığı vurğulanıb.