“Bu məsələ ilə bağlı bildirmək istəyirəm ki, sözü gedən hal qanunvericilikdə nəzərdə tutulmayıb. Qanunvericilikdə öz əksini tapmayan bir addımın tətbiq edilməsi isə normalda doğru deyil. Məsələnin birinci tərəfi budur.İkinci tərəfə gəlincə, valideynlərə hər hansı məsələ ilə bağlı cəza və ya cərimə tətbiq edildikdə, onsuz da övladını oxutmaq üçün maddi çətinlik çəkən ailələr əlavə maliyyə sıxıntısı ilə qarşılaşırlar. Düşünürəm ki, onları yenidən cərimələmək və ya maddi baxımdan çətin vəziyyətə salmaq əslində doğru yanaşma deyil”.
Bu fikirləri “Tehsil365”ə açıqlamasında təhsil eksperti Elçin Murad deyib.
Onun sözlərinə görə,söhbət övladını təhsilə yönəltməyib, onu işləməyə məcbur edən, təhsildən uzaqlaşdırmağa çalışan valideynlərdən gedirsə, onların cərimələnməsi təbiidir və olmalıdır.
“Lakin elə situasiyalar var ki, valideyn hər hansı obyektiv və ya məcburi səbəbdən övladını dərsə göndərə bilmir. Belə hallarda məsələni araşdırmaq və öncə valideynlə həmsöhbət olmaq lazımdır.Övladını hansı səbəbdən məktəbə göndərə bilmir?
Əgər sadəcə evə əlavə gəlir gətirsin deyə uşaq əməyindən sui-istifadə halı varsa, bəli, valideyn cərimələnə bilər. Lakin məcburi və ya digər obyektiv səbəblərdən uşağını məktəbə göndərə bilmirsə, həmin valideyni cərimələmək doğru deyil. Əksinə, valideynin qarşılaşdığı çətinliyi həll edib aradan qaldırmaq lazımdır ki, övladını təhsildən yayındırmasın”.
“Ekspertin fikirincə,hadisələrə tək tərəfli baxmaq olmaz. Məsələyə hərtərəfli yanaşmaq, dərindən araşdırmaq və yalnız bundan sonra yekun qərar vermək lazımdır”.