Fransa-Azərbaycan Universitetinin (UFAZ) tələbələri oktyabrın 5-dən 9-dək Türkiyənin Antalya şəhərində keçirilən 77-ci Beynəlxalq Astronavtika Konqresində (IAC 2026) Azərbaycanın milli elmi nümayəndə heyətinin üzvləri kimi iştirak ediblər.
“Tehsil365” xəbər verir ki, bu haqda Fransa-Azərbaycan Universiteti (UFAZ ) öz rəsmi saytında məlumat yayıb.
Bildirilib ki, Beynəlxalq Astronavtika Federasiyasının (IAF) təşkilatçılığı və Türkiyə Kosmik Agentliyinin (TUA) ev sahibliyi ilə keçirilən konqresdə dünyanın müxtəlif ölkələrindən kosmik agentliklərin nümayəndələri, alimlər, mühəndislər, tədqiqatçılar, sənaye təmsilçiləri və tələbələr bir araya gəliblər.
“Dünyaya daha çox kosmos lazımdır” (“The World Needs More Space”) şüarı altında təşkil olunan builki konqres bilik mübadiləsi, fikir mübadiləsi və kosmik tədqiqatlar, eləcə də innovativ texnologiyalar sahəsində beynəlxalq elmi əməkdaşlığın inkişafı üçün platforma rolunu oynayıb.
UFAZ-ın Kompüter elmləri, həmçinin Geologiya, geofizika və geoehtiyatlar ixtisasları üzrə təhsil alan tələbələri tədqiqat işlərini şifahi və interaktiv təqdimatlar vasitəsilə beynəlxalq auditoriyaya təqdim ediblər. Onların araşdırmaları peyk sistemlərində anomaliyaların aşkarlanması, Yer səthinin müşahidəsi, kosmik obyektlərin orbitlərinin modelləşdirilməsi və kosmik sistemlərin monitorinqi kimi aktual mövzuları əhatə edib.
Tələbələr konqresdə aşağıdakı elmi tədqiqat işlərini təqdim ediblər:
1. “Kosmik tullantıların orbitinin qısamüddətli proqnozlaşdırılması üçün fiziki qanunlara əsaslanan hibrid qalıq öyrənmə metodu”
Müəllif: Məryəm Axundova.
2. “Kod vasitəsilə astrodinamikanın öyrənilməsi: kompüter elmləri tələbəsinin Türkiyənin AYAP missiyasını anlamaq təcrübəsi”
Müəlliflər: Məryəm Axundova və Dmitriy Kuramşin.
3. “Kosmik sistemlərdə struktur bütövlüyünün monitorinqi və anomaliyaların aşkarlanması üçün paylanmış akustik ölçmələrə əsaslanan fiber-optik sistem”
Müəllif: Kamila Rəhimova.
4. “Passiv seysmologiya vasitəsilə Europa tipli peyklərdə buz və okean arasındakı sərhədlərin aşkarlanması”
Müəllif: İlham Məmmədzadə.
5. “Kiçik peyklərin telemetriya məlumatlarında anomaliyaların aşkarlanması üçün simulyasiyaya əsaslanan çərçivə”
Müəlliflər: Laman Tağıyeva və Fərhad Budaqov.
6. “Yer müşahidəsi məlumatlarından istifadə etməklə vulkan mənşəli SO₂ emissiyalarının peyk məlumatları əsasında aşkarlanması üçün verilənlərə əsaslanan metod”
Müəlliflər: Laman Tağıyeva və Fərhad Budaqov.