Fransa-Azərbaycan Universiteti (UFAZ) Dövlət Məşğulluq Agentliyinin Mərkəzi Karyera filialı ilə əməkdaşlıq çərçivəsində “KLAB” (Karyera Laboratoriyası) layihəsinə start verib. Layihənin məqsədi tələbələrin şəxsi və peşəkar inkişafını dəstəkləmək, onların əmək bazarına daha hazırlıqlı şəkildə daxil olmalarına kömək etməkdir.
“Tehsil365” xəbər verir ki, bu barədə Fransa- Azərbaycan Universiteti öz rəsmi saytında bildirib.
Qeyd edilib ki, bir neçə həftə davam edəcək layihə çərçivəsində UFAZ tələbələri təhsil aldıqları kursa və karyera inkişafının mərhələsinə uyğun olaraq bir sıra təlimlərdə iştirak edəcəklər. Proqram tələbələrə universitetin ilk ilindən məzuniyyətədək sistemli karyera dəstəyinin göstərilməsini nəzərdə tutur.
Layihə çərçivəsində ümumilikdə səkkiz təlim modulunun keçirilməsi planlaşdırılır. Birinci kurs tələbələri “Özünüdərk” və “Potensialının kəşfi”, ikinci kurs tələbələri “Əmək bazarının təhlili” və “Karyera məqsədlərinin müəyyənləşdirilməsi və fəaliyyət planının hazırlanması” mövzularında təlimlərə qatılacaqlar.
Üçüncü kurs tələbələri “İş mühitində effektiv ünsiyyət” və “Komanda işi və uyğunlaşma bacarıqları”, dördüncü kurs tələbələri isə “Peşəkar CV-nin hazırlanması” və “Müsahibə texnikaları” mövzularını əhatə edən təlimlərdə iştirak edəcəklər.
Təlimlər tələbələrin güclü tərəflərini və potensiallarını daha yaxşı tanımalarına, aydın karyera hədəfləri müəyyənləşdirmələrinə, əmək bazarının tələblərini daha dərindən anlamalarına, ünsiyyət və komanda işi bacarıqlarını inkişaf etdirmələrinə, eləcə də işə qəbul prosesinə daha inamlı və hazırlıqlı şəkildə qatılmalarına dəstək olmaq məqsədi daşıyır.